काठमाडौं । आईसीसी विश्वकप क्रिकेट लिग टू अन्तर्गत त्रिकोणात्मक एकदिवसीय अन्तराष्ट्रिय सिरिजमा नेपालले नामिबियालाई पहिलोपटक हराएको छ ।
टियु क्रिकेट मैदानमा मंगलबार भएको खेलमा नेपालले नामिबियालाई २ विकेटले हराएको हो ।
नामिबियाले दिएको २ सय ८६ रनको लक्ष्य नेपालले ४७ ओभर ४ बलमा ८ विकेट गुमाएर पूरा गर्यो । नेपालको जितको लागि कुशल भुर्तेलले १ सय १५ रनको कीर्तिमानी शतकीय इनिङ खेले ।
कुशलको यो एकदिवसीय अन्तराष्ट्रियमा पहिलो शतक हो । साथै, टी२० अन्तराष्ट्रिय तथा एकदिवसीय अन्तराष्ट्रियमा शतक बनाउने भुर्तेल तेस्रो नेपाली खेलाडी हुन् । यस अघि पारस खड्का र दीपेन्द्र सिंह ऐरीले शतक प्रहार गरिसकेका थिए ।
नेपालको लागि कप्तान रोहित पौडेलले ७६ बलमा ७२ रन बनाए । उनले ७ चौका र ३ छक्का प्रहार गरेका थिए । यस्तै, ३ चौका र १ छक्काके सहयोगमा सन्दीप जोराले २४ बलमा २८ रन बनाएका छन् । पूर्व कप्तान ज्ञानेन्द्र मल्लले २५ बनाए भने करण केसीले २० रन जोडे । सन्दीप लामिछाने भने गोल्डेन डग आउट भए ।
नामिबियाको तर्फबाट बलिङ गरेका रुवेल ट्रम्पेलम्यान र जान निकोलले समान ३र३ विकेट लिए ।
त्यसअघि पहिले ब्याटिङ गरेको नामिबियाले मिचेल भानले १ सय ३७ बलमा १ सय ३३ रनको शतकीय ईनिङ खेले। उनले ९ चौका र ५ छक्का प्रहार गरेका थिए । कप्तान ग्रेर्हाड इरास्मसले ७९ बलमा ५६ रनको अर्धशतकीय ईनिङ खेलेका थिए भने जान ग्रिनले ३४ रन बनाएका थिए ।
नेपालका लागि करण केसीले १० ओभरमा ६१ रन खर्चिएर ५ विकेट लिए । एकदिवसीय अन्तराष्ट्रियमा करणको यो तेस्रो ५ विकेट हो । सन्दीप लामिछानेले ३ विकेट लिए भने सोमपाल कामी र कुशल मल्लले समान १/१ विकेट लिए ।
सिरिजमा नेपाल २५ खेलमा २० अंक जोडेर छैटौं स्थानमा रहेको छ भने नामिबिया ३१ खेलमा ३७ अंकसहित तेस्रो स्थानमा रहेको छ ।
