एजेन्सी । भारतमा हुन गइरहेको पहिलो महिला प्रिमियर लिग (डब्लूपीएल)का लागि खेलाडीको लिलामी सुरु भएको छ ।
मुम्बईको जियो वर्ल्ड कन्भेन्सन सेन्टरमा चलिरहेको लिलामी स्मृति मन्धानाको नामबाट सुरु भएको छ । उनलाई बैंगलोरले ३.४ करोडमा किनेको हो । तीन सेट लिलामी भइसकेका छन् भने चौथो सेट लिलामीमा छ ।
सोफिया डंकली ६० लाखमा बिक्री भएकी छन् । उनलाइए गुजरातले किनेको छ । यस्तै, जेमिमा रोड्रिग्सलाई दिल्ली क्यापिटल्सले २.२ करोडमा किनेको छ । म्याग ल्यानिङलाई दिल्लीले एक करोड १० लाख रुपैयाँमा किनेको थियो । जबकि सुजी वेट्स, ताजमिन ब्रीट्स र लौरा वोल्भार्ड अनसोल्ड रहे ।
दोस्रो सेटका सबै खेलाडीले एक करोडभन्दा बढीको बोली पाए । भारतीय दीप्ती शर्मालाई युपी वारियर्सले २.६० करोडमा किनेको छ । आरसीबीले भारतकी नै रेणुका सिंहलाई १.५० करोडमा किनेको छ । नताली स्काइभर ब्रन्टलाई मुम्बईले ३.२० करोडमा किनेको छ । उनी इंग्ल्याण्डकी सबैभन्दा महँगो खेलाडी बनिन् । यूपीले अस्ट्रेलियाकी ताहिलिया म्याकग्रालाई १.४० करोडमा किनेको छ ।
अष्ट्रेलियाकी बेथ मुनीलाई गुजरातले २ करोडमा समावेश गरेको थियो । यूपीले दक्षिण अफ्रिकाकी शबनिम इस्माइललाई एक करोड भारुमा किनेको छ । योसँगै न्यूजिल्याण्डकी अमेलिया केरलाई मुम्बईले एक करोड भारुमा टिममा भित्र्याएको छ ।
