एजेन्सी । भारतमा पहिलो पटक हुन गइरहेको महिला प्रिमियर लिग (डब्लूपीएल)को पहिलो सिजनका आज अक्शन हुँदैछ ।
मुम्बईको जियो वल्र्ड कन्भेन्सन सेन्टरमा दिउँसो २ः४५ बजेदेखि खेलाडीको लिलामी हुँदैछ । यस मेगा लिलामीमा ४०९ खेलाडीको बोली लगाइनेछ । जसमा १५ देशका महिला क्रिकेटर रहेका छन् ।
डब्लूपीएलको अक्सनका लागि नेपालबाट ५ खेलाडीको नाम सिफारिस गरिएको थियो । जसमा कप्तान रुविना क्षेत्रीसहित सीता राना मगर, इन्दु बर्मा, कविता कुँवर र अस्मिना कर्माचार्य रहेका थिए । तर अक्सनका लागि जारी भएको ४ सय ९ जना खेलाडीको अन्तिम सूचीमा नेपालका कुनै पनि खेलाडीले स्थान बनाउन सकेनन् ।
बीसीसीआईका अनुसार लिलामीका लागि विश्वभरबाट १,५२५ खेलाडीले दर्ता गरेका थिए, जसमध्ये २४६ भारतीय र १६३ विदेशी खेलाडीलाई सर्टलिस्ट गरिएको छ । ती सबैले अब ९० स्थानका लागि प्रतिस्पर्धा गर्नेछन् ।
लिलामीमा २४ खेलाडीको उच्चतम आधार मूल्य ५० लाख रुपैयाँ रहेको छ । जसमा १० भारतीय र १४ विदेशी खेलाडी छन् । जबकि ३० खेलाडीले आधार मूल्य ४० लाख राखेका छन् । यससँगै भारतको यू–१९ महिला टी–२० विश्वकप विजेता टोलीका सबै खेलाडीले लिलामीका लागि दर्ता गरेका छन् ।
अन्तिम सूचीमा भारतबाहेक अष्ट्रेलिया, इंग्ल्याण्ड, न्यूजिल्याण्ड, दक्षिण अफ्रिका, वेस्ट इन्डिज, श्रीलंका, बंगलादेश, आयरल्याण्ड र जिम्बाब्वेका खेलाडी रहेका छन् । यससँगै एसोसिएट राष्ट्र युएई, हङकङ, थाइल्याण्ड, नेदरल्याण्ड र अमेरिकाका ८ खेलाडीले लिलामीमा बोलपत्र लगाउनेछन् ।
लिलामीमा खेलाडी किन्न डब्ल्यूपीएल टोलीले १२ करोड रुपैयाँ पाउनेछ । पर्समा प्रत्येक वर्ष डेढ करोड रुपैयाँ बढ्नेछ । यो रकम पुरुषको आईपीएलको तुलनामा निकै कम हो । पुरुषको आईपीएलमा एउटा टोलीसँग ९५ करोड भारु रहेको थियो । प्रत्येक टोलीले लिलामीमा १५ देखि १८ खेलाडीहरू किन्न सक्छ । प्रत्येक टोलीमा बढीमा ६ विदेशी खेलाडी मात्र समावेश गर्न सकिनेछ । सोही अनुसार कुल ९० खेलाडी किनिनेछन् ।
डब्लूपीएल आगामी मार्च ४ देखि २६ सम्म मुम्बईमा हुनेछ । जसमा ५ टिमले प्रतिस्पर्धा गर्नेछन् । प्रतियोगिताको विजेता टोलीले ६ करोड, उपविजेताले ३ करोड र तेस्रो हुने टोलीले १ करोड रुपैयाँ पाउनेछन् ।
