एजेन्सी । भारतीय रियालिटी शो ‘बिग बोस १६’ को उपाधि र्यापर एमसी स्टेनले जितेका छन् । आइतबार राति भएको फिनालेमा उनी विजेता घोषित भएका हुन् । यस्तै, शिव ठाकरे उपविजेता भए । यो सिजन ४ महिनासम्म चलेको थियो ।
पुरस्कारस्वरूप र्यापरले ३१ लाख रुपैयाँ र एउटा लक्जरी कार पाए । यसअघि उनी एमटिभीका विजेता भइसकेका छन् ।
शीर्ष ३ फाइनलिस्टमा प्रियंका चाहर चौधरी, शिव ठाकरे र एमसी स्टेन रहेका थिए । प्रियंका अन्तिममा बाहिरिइन् । एमसी स्टेनले सबैभन्दा बढी मत पाए ।
कार्यक्रमको फाइनल करिब ५ घण्टासम्म चलेको थियो । प्रियंकाले बिग बोस १६ को उपाधि जित्न नसके पनि सलमानले आफ्नो लागि वास्तविक विजेता प्रियंका नै भएको बताए ।
कार्यक्रमको फाइनलमा धेरै टिभी कलाकार र बलिउड स्टारकास्ट पनि पुगेका थिए । यसै क्रममा अभिनेता सनी देओल र अमिषा पटेल आफ्नो आगामी फिल्म गदर २ को प्रमोशन गर्न पुगेका थिए ।
फ्यानहरूले बिग बोसको १५ औं सिजन भन्दा १६ औं सिजनलाई बढी मन पराएका छन् । यद्यपि, धेरै दर्शकहरू विश्वास गर्छन् कि शोको पहिलेका सिजनहरू अझ राम्रो थिए । बिग बोसको पहिलो सिजन आशिकी अभिनेता राहुल रोयले जितेका थिए । कार्यक्रमको होस्ट अर्शद वारसी थिए ।
