सरकारसँगको ६ बुँदे सहमतिसँगै चिकित्सक संघको आन्दोलन स्थगित

काठमाडौँ । नेपाल चिकित्सक संघले आफ्नो आन्दोलन स्थगित गरेको छ । सरकारसँग छ बुँदे सहमति भएर संघले आन्दोलनका कार्यक्रम स्थगित गरेको हो ।

राष्ट्रपति विद्यादेवी भण्डारीको सवारीका क्रममा शुक्रबार ट्रमा सेन्टरका एक चिकित्सकलाई प्रहरीले घाइते बनाएको विरोधमा संघले देशभारका अस्पतालमा आकस्मिक सेवाबाहेक सबै सेवा ठप्प बनाउने निर्णय गरेको थियो ।

आज प्रधानमन्त्री तथा मन्त्रिपरिषद्को कार्यालयमा सरकारी प्रतिनिधि र चिकित्सहरुबीच भएको वार्तामा आन्दोलन स्थगित गर्न सहमति भएको हो ।

एक साताभित्र चिकित्सक कुटिएको घटनाको समग्र पक्षमा छानबिन गरी दोषीलाई कारबाही, घाइते चिकित्सकको उपचारको व्यवस्था सरकारले गर्ने, स्वास्थ्यकर्मी र स्वास्थ्य संस्थाको सुरक्षा व्यवस्थालाई प्रभावकारी कार्यान्वयन गर्ने र चिकित्सक संघले आन्दोलन स्थगित गर्ने सहमति भएको छ ।