काठमाडौँ । त्रिभुवन अन्तर्राष्ट्रिय विमास्थलका महाप्रबन्धक प्रेमनाथ ठाकुरलाई निलम्बन गरिएको छ । ठाकुरले थाई स्माइल एयरलाइन्सका प्रतिनिधिसँग गैरकानूनी लाभ लिने उद्देश्यले गरेको कुराकानीको श्रव्य सामग्री प्राप्त भएपछि उहाँलाई निलम्बन गरिएको हो ।
संस्कृति, पर्यटन तथा नागरिक उड्डयन मन्त्रालयले नेपाल नागरिक उड्डयन प्राधिकरणका महाप्रबन्धकलाई सोबारे जाँचबुझ गर्ने सिलसिलामा महाप्रबन्धक ठाकुरलाई पदबाट निलम्बन गर्न पत्र पठाएको बताइएको छ ।
थप अनुसन्धान गर्न अख्तियार दुरुपयोग अनुसन्धान आयोगमा समेत पत्र पठाइने मन्त्रालयले बताएको छ । पछिल्लो दुई वर्षयता ठाकुर विमानस्थलको प्रमुख पदमा कार्यरत हुनुहुन्थ्यो । यसअघि यही माघ ९ गने त्रिभुवन विमानस्थलको आन्तरिक टर्मिनल प्रमुख पूर्ण कुँवरलाई पनि अख्तियार दुरुपयोग अनुसन्धान आयोगले स्रोत नखुलेको रकमसहित पक्राउ गरेको थियो ।
