काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेको पासपोर्टमाथि अनुसन्धान सुरु भएको छ । सरकारी वकिलको कार्यालय काठमाडौँले आफूकहाँ पेश भएका जाहेरीका आधारमा एकसाथ तीन निकायबाट कागजात मगाएर अनुसन्धान सुरु गरेको छ ।
कार्यालयले युवराज पौडेल सफलले दिएको जाहेरीका आधारमा सत्यता के हो, जाहेरीमा उल्लेख भएअनुसार सत्यता हो कि होइन भन्नेबारे जिल्ला प्रशासन कार्यालय, अध्यागमन विभाग र राहदानी विभागमा लामिछानेको विस्तृत विवरण मगाउने निर्णय गरेको छ ।
कार्यालयका अनुसार तीनवटै निकायबाट प्रमाण संकलन भएर पुष्टि भएपछि मात्र जाहेरी दर्ताका लागि जिल्ला प्रहरी परिसर काठमाडौँमा पठाइनेछ ।
निवर्तमान गृहमन्त्री लामिछाने विरुद्धको जाहेरी दर्ता लिन जिल्ला प्रहरी परिसर काठमाडौँले अस्वीकार गरेको थियो । त्यसपछि युवराज पौडेल सफलले सरकारी वकिलको कार्यालय काठमाडौँमा जाहेरी पेश गरेका थिए । सरकारी वकिलको कार्यालयले जाहेरीमा उल्लिखित व्यहोरासँग सम्बन्धित कागजात र अन्य विवरण मगाएको हो ।
सुरुमा लामिछानेले विसं २०५० फागुन १० गते जिल्ला प्रशासन कार्यालय काठमाडौँबाट नागरिकताको प्रमाणपत्र लिनुभएको थियो । अमेरिका गएपछि उहाँले सन् २०१४ फेब्रुअरी २१ (विसं २०७० फागुन ९ गते) अमेरिकाको नागरिकता लिनुभएको थियो । अमेरिकाको नागरिकता लिएर नै सन् २०१५ मे ११ (विसं २०७२ वैशाख २८ गते) उहाँले नेपाल फर्किएर जेठ १३ मा नेपाली पासपोर्ट लिनुभएको थियो । उहाँले नेपाल फर्कँदा अमेरिकाको नागरिकता त्याग्नुभएको थिएन ।
यही माघ १३ गते सर्वोच्च अदालतले विदेशको नागरिकता लिनेहरुको नेपाली नागरिकता कायम नरहने भनी व्याख्या गरेको थियो । सो हिसाबले उहाँको नेपाली नागरिकता मान्य भएको थिएन । तर उहाँले सोही पुरानो नेपाली नागरिकताका आधारमा नेपाली पासपोर्ट लिएकाले उहाँमाथि झुटो विवरण पेश गरेको आरोप लागेको हो ।
