काठमाडौँ । अख्तियार दुरुपयोग अनुसन्धान आयोगमा नेकपा एमालेका अध्यक्ष केपी शर्मा ओलीविरुद्ध उजुरी परेको छ ।
नेकपा (एकीकृत समाजवादी) निकट अनेरास्ववियुले बिहीबार तत्कालीन प्रधानमन्त्री ओलीसँगै उहाँको मन्त्रिपरिषदमा रहेका ईश्वर पोखरेल, योगेश भट्टराई, पद्मा अर्याल र भानुभक्त ढकालविरुद्ध उजुरी दर्ता गरेको छ ।
उजुरीकर्ता अनेरास्ववियु बागमती कमिटी प्रदेशका संयोजक दीपक बुढाथोकीले झापा जिल्लास्थित गिरीबन्धु टी स्टेको नाममा बिर्तामोड र अर्जुनधारामा गरी ३०० बिघाभन्दा बढी सट्टापट्टा गर्न ऐन संशोधन गरी नीतिगत भ्रष्टाचार गरेको आरोप लगाएका छन् ।
त्यस्तै कोरोना महामारीको समयमा ओम्नी ग्रुपसँग मिलेमतो गरी स्वास्थ्य सामग्री खरिद प्रक्रियामा तत्कालीन कोभिड–१९ क्राइसिस म्यानेजमेन्ट सेन्टर (सिसीएमसी) को संयोजक हैसियतमा उपप्रधानमन्त्री पोखरेल र स्वास्थ्यमन्त्री ढकालले करोडौँ रुपैयाँको भ्रष्टाचार गरेको आरोप लगाइएको छ ।
उजुरीमा भिजिट नेपाल २०२० मा विदेशीहरुलाई व्यापकरुपमा भित्र्याउने उद्देश्यले प्रचार प्रसारका लागि भनी राज्यकोषको करोडौँ रकम तत्कालीन पर्यटनमन्त्री भट्टराईले भ्रष्टाचार गरेको आरोप लगाइएको छ ।
