काठमाडौँ । नेपाली कांग्रेसका महामन्त्री गगन थापाले पाँच दलीय गठबन्धन टुटाउन नेकपा (एमाले) ले छट्टु काम गरेको टिप्पणी गर्नुभएको छ ।
बुधबार काठमाडौँमा आयोजित एक कार्यक्रममा उहाँले पुस १० गते एमालेले कांग्रेसलाई सरकार गठनका लागि ३ बजे तयार भएर बस्नु हस्ताक्षर लिएर आउछौँ भनेको तर पछि छट्टु काम गरेर गठबन्धन टुटेको बताउनुभयो ।
उहाँले भन्नुभयो, “हामी १ बजेपछि एमाले आउँछ भनेर दंग परेर बस्यौँ। माओवादी साथीहरुलाई पनि एमालेले कांग्रेस छाडेर आउनुस् दिन्छौँ भनेकै हो । उहाँहरु ढुक्क भएर जानुभयो । एमालेले त्यो दिन छट्टु काम गरेकै हो । हामी झुक्कियौँ ।”
महामन्त्री थापाले पाँच दलीय गठबन्धन टुटेकोप्रति जनतासँग माफी माग्नुपर्ने बताउनुभयो । लाखौँ जनतालाई गठबन्धनको भारी बोलाएर अहिले जोगाउन नसकेपछि हामीले आत्मालोचना गरेर जनतासँग क्षमा माग्नुपर्छ भन्दै उहाँले भन्नुभयो, “हामीले हाम्रो निर्णय गलत थियो भन्नुपर्छ ।”
चुनावमा गठबन्धन गरेर जनताको मत हाल्ने अधिकारलाई समेत सीमित गरेको भन्दै उहाँले अहिले चुनावअघिको गठबन्धन जोगाउन नसकेको विषयमा पार्टीमा आरोपप्रत्यारोप चलेको उल्लेख गर्नुभयो ।
महामन्त्री थापाले हिजोको राष्ट्रपतिका कारण फेरि एमाले उम्मेदवारलाई राष्ट्रपति बनाए संविधान दुर्घटनामा पर्छ कि भन्ने डर रहेको भन्दै एमालेको उम्मेदवार राष्ट्रपति भए ‘सम्माननीय कठपुतली राष्ट्रपति’ बन्ने टिप्पणी गर्नुभयो ।
एमाले नेतृत्वले कार्यकर्तालाई राष्ट्रपति बनायो भने ‘सम्माननीय कठपुतली राष्ट्रपति’ भने हुन्छ भन्दै उहाँले भन्नुभयो, “त्यसले विस्तारै समानान्तर शक्तिको अभ्यास गर्छ ।”
बालुवाटार र शीतल निवास केन्द्र बन्ने र एक ठाउँमा पुगेर संविधानलाई दुर्घटनामा पार्ने उहाँको भनाइ थियो । महामन्त्री थापाले नेपाली कांग्रेस एमालेले प्रस्ताव गर्ने राष्ट्रपतिको उम्मेदवारलाई हराउन लाग्ने उल्लेख गर्दै कांग्रेसले आफ्नै उम्मेदवारका लागि भोट माग्ने बताउनुभयो ।
