घोराही । राष्ट्रियसभाको एक पदका लागि लुम्बिनी प्रदेशस्थित दाङको घोराहीमा उपनिर्वाचन सुरु भएको छ । घोराहीस्थित कर्मचारी मिलन केन्द्रमा आज बिहान १० बजेदेखि मतदान सुरु भएको हो ।
अहिले मतदान जारी छ । पहिलो मतदान लुम्बिनी प्रदेशसभा सदस्य एवं मन्त्री चेतनारायण आचार्यले गर्नुभएको छ । प्रदेश निर्वाचन कार्यालय दाङका सूचना अधिकारी गेहेन्द्र कुँवरका अनुसार अपराह्न ३ बजेसम्म मतदान गर्ने समय निर्धारण गरिएको छ ।
प्रतिनिधिसभा सदस्य निर्वाचनमा उम्मेदवार हुन नेकपा (एमाले) का खिमलाल भट्टराईले राष्ट्रियसभा सदस्य पदबाट राजीनामा दिएपछि उक्त पद रिक्त थियो । रिक्त पदमा सत्तारुढ दलबाट एमालेका कुमार दसौँदी, नेपाली कांग्रेसबाट माधवप्रसाद आचार्य र नागरिक उन्मुक्ति पार्टी (नाउपा) बाट राजेन्द्रवीर रायले उम्मेदवारी दिनुभएको छ ।
राष्ट्रियसभा सदस्यका लागि प्रदेशसभा सदस्य र पालिकाका प्रमुख र उपप्रमुखले मतदान गर्ने व्यवस्था छ । कूल मतदाता संख्या ३०५ रहेको लुम्बिनी प्रदेशमा प्रदेशसभा सदस्यको संख्या ८७ रहेको छ । १०९ स्थानीय तह रहेको प्रदेशमा पालिकाका प्रमुख र उपप्रमुख गरी कूल २१८ जना मतदाता रहेका छन् ।
