काठमाडौँ । सञ्चार तथा सूचना प्रविधिमन्त्री रेखा शर्माले सरकारसँग सरकारी आइटी क्षेत्रको मुख्य साँचो नरहेको बताउनुभएको छ । काठमाडौँको भृकुटीमण्डपमा मंगलबारदेखि सुरु भएको ‘सूचना प्रविधि मेला’ को उद्घाटन कार्यक्रममा उहाँले सरकारी तथ्यांकहरुको सुरक्षामाथि प्रश्नहरु रहेको बताउनुभयो ।
उहाँले सरकारले आफ्नै सूचना प्रविधि (आइटी) कम्पनी खोल्नुपर्ने आवश्यकता औँल्याउनुभयो । सरकारले केही काम गर्नुपर्दा बाहिरबाट जनशक्ति ल्याउनुपरिरहेको तर नेपालको जनशक्ति भने बाहिर गइरहेको उहाँको भनाइ थियो ।
“हामीसँग थुप्रै डेटा सेन्टर छन् तर त्यसको सुरक्षा र मुख्य साँचो हामीसँग छैन”, उहाँले भन्नुभयो । राष्ट्रियताको कुरा गर्ने हामी त्यसलाई कसरी बचाउन सक्छौँ भन्दै उहाँले भन्नुभयो, “मन्त्रालयहरुको संवेदनशील सफ्टवेयर भए पनि त्यसको मुख्य कुरा कहाँ छ भन्नेबारे हामीलाई नै थाहा छैन ।”
सूचना प्रविधि क्षेत्रलाई व्यवस्थित बनाउन सरकारले प्रयास गरिरहेको भन्दै उहाँले यसका लागि आवश्यक कानूनहरु निर्माणका लागि तत्काल संसद्मा पेश गर्ने तयारी भइरहेको जानकारी दिनुभयो ।
सरकारले सूचना प्रविधि क्षेत्रको विकास गरेर मुलुकलाई अघि बढाउन महत्वकांक्षी योजनाहरु अघि साने योजना सरकारको रहेको उहाँको भनाइ थियो ।
