काठमाडौं । प्रधानमन्त्री पुष्पकमल दाहाल प्रचण्डले गृह मन्त्रालयका कारण सत्ता गठबन्धनमा उत्पन्न भएको विवादको समाधान हुने बताउनुभएको छ ।
शनिबार माओवादी केन्द्रको स्थायी समितिको बैठकपछि सञ्चारकर्मीको प्रश्नको जवाफमा उहाँले भन्नुभयो, ‘अहिले मेरो कुरा हुँदैछ, समस्या समाधान हुन्छ ।’
राष्ट्रिय स्वतन्त्र पार्टी (रास्वपा)का सभापति रवि लामिछानेले आफूलाई पुनः गृह मन्त्रालय दिन माग गरिरहनुभएको अवस्थामा प्रधानमन्त्री प्रचण्डले उहाँलाई गृह मन्त्रालय दिन चाहनुभएको छैन । यही कारण सत्ता गठबन्धनभित्र विवाद बढेको हो ।
राष्ट्रिय स्वतन्त्र पार्टीले गृह मन्त्रालय आफूलाई नदिए सरकारबाट बाहिरिने चेतावनी दिएको छ । बिहीबार बसेको सो पार्टीको बैठकले प्रधानमन्त्रीलाई दिएको दुई दिनको समय आज सकिँदैछ ।
