काठमाडौँ । प्रमुख निर्वाचन आयुक्त दिनेशकुमार थपलियाले असल नियतले समयमै सम्पन्न गर्ने गरी राष्ट्रपति र उपराष्ट्रपति निर्वाचनको मिति तय गरिएको बताउनुभएको छ ।
उहाँले दुवै पदको निर्वाचनको मिति तोक्दा पनि र नतोक्दा पनि आफूहरुमाथि प्रश्न उठेको भन्दै असल नियतले मिति तोकिएकाले निर्वाचन सम्पन्न भएपछि ती प्रश्न आफैँ अन्त्य हुने बताउनुभयो ।
आगामी फागुन २५ गते राष्ट्रपतिको र चैत ३ गते उपराष्ट्रपतिको निर्वाचनको मिति निर्वाचन आयोगले तोकेको छ । यद्यपि आयुक्त ईश्वरी न्यौपानेले राष्ट्रपति र उपराष्ट्रपति पदको निर्वाचनसम्बन्धी ऐनमा कार्यकाल सकिनुभन्दा एक महिना अगाडि नै निर्वाचन गरिसक्नुपर्ने व्यवस्था रहेको उल्लेख गर्दै फरक मत राख्नुभएको छ ।
शुक्रबार आयोजित कार्यक्रममा प्रमुख निर्वाचन आयुक्त थपलियाले संविधान र कानूनका बीचमा केही द्विविधाहरु कायमै रहेको बताउनुभयो । उहाँले ती द्विविधालाई निर्वाचन आयोगले सम्बोधन गर्दै अघि बढेको उल्लेख गर्नुभयो ।
