काठमाडौँ । सत्तारुढ नेकपा (माओवादी केन्द्र)को आजको लागि तय भएको स्थायी कमिटी बैठक स्थगित भएको छ । प्रधानमन्त्री एवम् पार्टी अध्यक्ष पुष्पकमल दाहाल ‘प्रचण्ड’को व्यस्तताको कारण आजको बैठक पनि स्थगित भएको हो ।
अध्यक्ष प्रचण्ड शुक्रबार सिन्धुपाल्चोकमा आयोजित एक कार्यक्रममा व्यस्त हुनुहुन्छ । उक्त कार्यक्रम सकिएपछि उहाँले नेपाल भ्रमणमा रहनुभएका मलेसियाका गृहमन्त्रीसँग भेट्ने कार्यक्रम छ । प्रधानमन्त्री प्रचण्डले दिउँसो चार बजे मलेसियाका गृहमन्त्री सैफुदिन नासुसन इस्माइलसँग भेट्ने कार्यक्रम छ ।
पार्टी कार्यालय पेरिसडाँडामा दिउँसो ३ बजे बस्ने तय भएर स्थगित भएको आजको माओवादी स्थायी कमिटी बैठकमा राष्ट्रपति निर्वाचन, गृहमन्त्री चयनदेखि पार्टीका स्थायी र पोलिटब्यूरो सदस्यको केन्द्रीय विभागको कार्यविभाजन लगायतका विषयमा छलफल गर्ने तयारी थियो ।
