काठमाडौं । नेपाल क्रिकेट संघ (क्यान) ले आईसीसी क्रिकेट विश्वकप लिग टु अन्तर्गत स्कटल्याण्ड र नामिबिया विरुद्ध हुने त्रिकोणीय सिरिजका लागि बलात्कारको आरोप लागेका क्रिकेटर सन्दीप लामिछानेलाई समावेश गर्दै दोस्रो चरणको बन्द प्रशिक्षणमा रहने २० खेलाडीको घोषणा गरेको छ ।
बन्द प्रशिक्षणमा बोलाइएका २० खेलाडीमा कप्तान रोहित पौडेल, आसिफ शेख, ज्ञानेन्द्र मल्ल, कुशल भुर्तेल, आरिफ शेख, दीपेन्द्र सिंह ऐरी, कुशल मल्ल, गुलशन झा, करण केसी, ललित राजवंशी सन्दीप जोरा, भिम शार्की, कमल सिंह ऐरी, किशोर महतो, मौसम ढकाल, सूर्य तामाङ, सोमपाल कामी र अर्जुन साउद सन्दीप लामिछाने र प्रतिश जिसी रहेका छन् ।
यस अघि २८ खेलाडीको सूचीमा रहेका शरद भेषावकर, विनोद भण्डारी, सिद्धान्त लोहनी, अभिनाश बोहरा, विवेक यादव, अनिल साह, विक्रम सोब, भुवन कार्की, अंकित सुवेदी र सागर ढकाललाई भने समावेश गरिएको छैन ।
नेपालले आगामी फेब्रुअरी १४ देखि २१ सम्म काठमाडौँमै नामिबिया र स्कटल्याण्डसँग आइसीसी विश्वकप डिभिजन(२ अन्तर्गतको त्रिकोणीय सिरिज काठमाडौँमा खेल्दै छ ।
