काठमाडौँ । नागरिक उन्मुक्ति पार्टीकी अध्यक्ष एवं प्रतिनिधिसभा सांसद रन्जिता श्रेष्ठ चौधरीले निर्दोष थारुहरुलाई थुनामा राखेर राज्यले थारुलाई मात्र दोषी देख्नुमा असन्तुष्टि जनाएकी छन् ।
बुधबारको संसद बैठकमा बोल्दै सांसद श्रेष्ठले भनिन् ‘विकास र न्यायको लागि हामीलाई सडकदेखि संसदसम्म पुर्याइएको छ । हाम्रो आवाज छिटै सुनियोस् । हाम्रो जनमतको पनि कदर होस् । सय दोषी छुटोस् तर निर्दोष नफसोस् भन्ने कानुनको आधारभुत निकायको बर्खिलाप निर्दोष थारुहरु थुनेर राज्यले थारुलाई मात्र दोषी देख्नुमा हाम्रो चित्त दुखेको छ ।’
उनले अगाडी भनिन् ‘कैदीबन्दीहरु दोषी मात्र छैनन्, निर्दोषहरु पनि छन् । न्यायको आवाज उठाउनुस् भनेर हामीलाई संसदमा पठाइएको छ । सडकबाट बोलिएको सुनिएन सदनमा गएर बोल्नुस् भनेर नागरिक उन्मुक्ति पार्टीका सांसदलाई यहाँ पठाइएको छ । सम्माननीय सभामुख महोदय फैसलाको हथौडा ठोकेर भनिदिनुस् निर्दोष थारुहरुका लागि भनेर बनाइएको लाल आयोग कहाँ छ ? एकपटक खोजिदिनुस् ।’
