काठमाडौं । नेकपा (माओवादी केन्द्र) को पदाधिकारी बैठक सुरु भएको छ ।
पार्टी केन्द्रिय कार्यालय पेरिसडाँडामा सुरु भएको बैठकमा पछिल्ला राजनीतिक घटनाक्रमलगायत राष्ट्रपति र गृहमन्त्रीबारे छलफल हुने बताईएको छ ।
सत्ता साझेदार दलहरुबीच राष्ट्रपति निर्वाचन तथा गृह मन्त्रालयको विषयलाई लिएर मतभेद कायमै छ । सर्वोच्च अदालतले तत्कालीन उपप्रधानमन्त्री एवं गृहमन्त्री रवि लामिछानेको पुरानो नागरिकता अमान्य रहेको फैसला गरेसँगै उहाँ सांसद र मन्त्री पदबाट मुक्त हुनुभएको थियो ।
त्यसपछि प्रधानमन्त्री प्रचण्डले गृह मन्त्रालय आफैँले सम्हाल्दै आउनुभएको छ । रवि लामिछानेले पुनः नेपाली नागरिकता प्राप्त गरेपछि उहाँको दल राष्ट्रिय स्वतन्त्र पार्टीले गृह मन्त्रालयमा पुनः दाबी गरेको छ । लामिछानेले पार्टीबाट निर्णय गराएर पुनः सो मन्त्रालय लिन प्रधानमन्त्री प्रचण्डलाई दबाब दिइरहनुभएको छ ।
मंगलबार बिहान लामिछानेले प्रधानमन्त्री प्रचण्डलाई भेटी गृह मन्त्रालय नपाएर सरकारबाट बाहिरिने चेतावनी दिइसक्नुभएको छ । माओवादी केन्द्रको अहिले बसिरहेको पदाधिकारी बैठकमा प्रधानमन्त्रीले सोही विषयमा परामर्श लिने काम गरिरहनुभएको बताइएको छ ।
माओवादी केन्द्रभित्रै पनि लामिछानेलाई पुनः गृह मन्त्री बनाउने वा नबनाउने भन्नेबारे मतभेद देखिएको छ । यस्तै नेकपा (एमाले) ले पनि पूर्वसहमति अनुसार अघि बढ्न प्रधानमन्त्री प्रचण्डलाई दबाब दिइरहेको छ ।
