हेटौँडा । बागमती प्रदेशका नवनियुक्त मन्त्रीहरूले पद तथा गोपनीयताको शपथ ग्रहण गरेका छन् । बुधबार दिउँसो प्रदेश प्रमुख कार्यालय हेटौँडामा प्रदेश प्रमुख यादवचन्द्र शर्माले नवनियुक्त ८ जना मन्त्रीहरुलाई पद तथा गोपनीयताको शपथ ग्रहण गराएका हुन् ।
प्रदेशमा नेकपा एमालेले ४ मन्त्रालय, नेकपा माओवादी केन्द्रले मुख्यमन्त्री तथा थप ३ मन्त्रालय र राष्ट्रिय प्रजातन्त्र पार्टी (राप्रपा)ले ३ मन्त्रालय पाएका छन् ।
नेकपा एमालेबाट एकालाल श्रेष्ठ श्रम रोजगार तथा यातायात, रामेश्वर श्रेष्ठ स्वास्थ्य र केशवप्रसाद पोखरेल कृषि तथा पशुपन्छी विकास मन्त्रीको जिम्मेवारी लिँदै सपथ ग्रहण गरेका हुन्। एमाले संसदीय दलका नेता जगन्नाथ थपलिया यसअघि नै आर्थिक मामिला तथा योजना मन्त्री भइसकेका छन् ।
त्यस्तै, माओवादी केन्द्रबाट गंगानारायण श्रेष्ठ आन्तरिक मामिला तथा कानून, युवराज दुलाल भौतिक पूर्वाधार विकास र कुमारी मोक्तान सामाजिक विकास मन्त्रीको सपथ ग्रहण गरेका छन् । माओवादी संसदीय दलका नेता शालिकराम जम्कट्टेल प्रदेश मुख्यमन्त्री छन् ।
राप्रपाबाट डम्बरबहादुर तामाङ उद्योग, पर्यटन र सहकारी मन्त्री र राजु बिष्ट वन तथा वातावरण मन्त्री, राप्रपा संसदीय दलका नेता उद्धव थापाले खानेपानी, ऊर्जा तथा सिंचाई मन्त्रीको जिम्मेवारी लिँदै सपथ ग्रहण गरेका हुन् ।
