काठमाडौं । काठमाडौं महानगरले नगर प्रहरी प्रमुख राजुनाथ पाण्डेमाथि छानबिन गर्न गठन गरेको समितिको दोस्रोपटक म्याद थप गरेको छ ।
महिला प्रहरीलाई दुर्व्यवहार गरेको आरोप लागेका पाण्डेमाथि छानबिन गर्ने काम अझै पनि जारी रहेकाले थप एक साता म्याद थप गरिएको छानबिन समितिका संयोजक तथा सामाजिक विकास विभागका प्रमुख गोपालप्रसाद पोखरेलले जानकारी दिए ।
छानबिन गर्दै जाँदा विभिन्न कुराहरू आएको र फेरि त्यस्ता कुराहरूमा अनुसन्धान गर्दा समय लागेको उनले बताए । महानगरले पुस २२ गते दुई साता म्याद थप गरेको थियो । त्यसपछि गत शुक्रबार फेरि एक साता म्याद थप गरेको हो ।
पाण्डेमाथि छानबिन गर्न तीन सदस्यीय समिति गठन गरिएको थियो । उक्त छानबिन समितिको संयोजकमा गोपालप्रसाद पोखरेल छन् भने न्याय प्रशासन विभागकी सुमित्रा लामिछाने र सहरी योजना आयोगकी उपनिर्देशक कुमारी राई सदस्य छन् ।
