काठमाडौं । नेपाल क्रिकेट संघ (क्यान)ले नेपाली राष्ट्रिय क्रिकेट टिमको प्रशिक्षकबारे कुनै निर्णय नभएको बताएको छ ।
आइतबार विभिन्न सञ्चारमाध्यममा नेपाली टिमको प्रशिक्षकमा भारतीय प्रशिक्षक मोन्टी देसाईलाई नियुक्त गर्ने भनेर सार्वजनिक खबरबारे प्रस्ट पार्दै क्यानले यसबारे अहिलेसम्म कुनै निर्णय नभएको जनाएको हो ।
क्यानले नेपाली टिमको प्रशिक्षकका लागि आएको २४ आवेदनमध्ये देसाईसँगै, अस्ट्रेलियाका डेभ वाट्मोर, न्युजिल्यान्डका ग्लेन पोकनल, दक्षिण अफ्रिकाका रुसेल डोमिंगो र श्रीलंकाका धम्मिका प्रसादसँग अन्तर्वार्ता लिएको थियो ।
क्यानले विज्ञप्ती जारी गर्दै भनेको छ –
नेपाली राष्ट्रिय क्रिकेट टिमको मुख्य प्रशिक्षक नियुक्त सम्बन्धमा केही अनलाइन संचार माध्यमहरुमा नेपाली राष्ट्रिय टोलिका मुख्य प्रशिक्षक नियुक्त नै भईसकेको भन्ने खालका समाचार बारे स्पष्ट पार्न चाहन्छौ । नेपाल क्रिकेट संघ द्वारा गठित ‘मुख्य प्रशिक्षक छनोट समिति’ ले छ्नौट प्रक्रिया पूरा गरि सिफारिस गरिएको मुख्य प्रशिक्षक नेपाल क्रिकेट संघको कार्य सम्पादन र कार्यसमितिका सदस्य हरुको सहमति भए पश्चात् मात्रै नियुक्ति गर्नका लागि राष्ट्रिय खेलकुद परिषदसँग अनुमती माग्ने र अनुमति प्राप्त भए पश्चात् मात्रै नयाँ प्रशिक्षक नियुक्त हुने सम्बन्धित सबैमा जानकारी गराईन्छ ।
