काठमाडौँ । सत्ता गठबन्धन बैठक जारी छ । बैठकको निष्कर्ष भने निस्कन सकेको छैन । अमेरिकी सहायता कार्यक्रम एमसीसीलाई संसदमा टेबल गर्ने विषयमा करिब एक सातादेखि सत्ता साझेदार दल बैठक बसिरहेका छन् ।
शुक्रबार पनि बसेको बैठक पुनः आइतबार बस्नेगरी सकिएको छ । अर्थात बैठक बस्ने तर निष्कर्ष निकाल्न नसक्ने अवस्थामा पुगेका छन् सत्ता साझेदार दलहरु । सत्ता साझेदारको प्रमुख दल नेपाली कांग्रेसले जसरी पनि एमसीसीलाई संसदमा टेबल गर्नुपर्ने बताउँदै आएको छ । तर सत्ता साझेदारकै नेकपा (माओवादी केन्द्र) र नेकपा (एकीकृत समाजवादी) यथास्थितिमा एमसीसी टेबल गर्न नहुने पक्षमा छन् ।
अर्थात सत्ता गठबन्धनमा बसेर एउटै विषयमा सत्ता साझेदार दलहरुबीच मतैक्य देखिएको छैन । दलहरु छलफल गर्ने तर निष्कर्ष निकाल्न नसक्ने अनि आवश्यक परे सत्ता गठबन्धन टुटाउनसम्म तम्तयार देखिने । यसै प्रसङ्गलाई लिएर जनता समाजवादी पार्टी (जसपा) नेपालका सङ्घीय परिषद् अध्यक्ष बाबुराम भट्टराईले ट्विट गर्नुभएको छ: गठबन्धनको बैठकमा सम्झेको नीतिकथा : घागडान शास्त्रीहरू यात्रा गर्दैरहेछन्।खाना पकाउन उत्तम ठाउॅ खोज्दा ज्योतिषशास्त्रीले दलदल रोजेछन्१तरकारीमा आयुर्वेदाचार्यले निमको पात खोजेछन्१ बल्लबल्ल छड्कन थालेको भातको अर्थ तर्कशास्त्रीले लगाउन नसक्दा कसौंडी नै घोप्टाएछन् र सबै भोकै हिंडेछन् !
