काठमाडौँ । नेकपा (एमाले) का सांसद देवराज घिमिरे प्रतिनिधिसभाको सभामुखमा निर्वाचित हुनुभएको छ । प्रतिनिधिसभाको बिहीबार बसेको बैठकमा उहाँको पक्षमा १६७ मत परेको थियो । उहाँको विपक्षमा भने १०० मत परेको थियो ।
सभामुख पदका लागि घिमिरे र न्यौपाने उम्मेदवार हुनुहुन्थ्यो । कूल २७५ सांसदमध्ये मतदान प्रक्रियामा २६८ सांसदहरु उपस्थित हुनुहुन्थ्यो । मतदान प्रक्रियामा एक सांसद तटस्थ बस्नुभएको थियो । घिमिरेको पक्षमा नेकपा (एमाले), नेकपा (माओवादी केन्द्र), राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी, जनमत पार्टी, नागरिक उन्मुक्ति पार्टीका र स्वतन्त्र सांसदहरु अमरेशकुमार सिंह, प्रभु साह र योगेन्द्र मण्डलले मतदान गर्नुभएको थियो ।
त्यस्तै सभामुखका अर्का उम्मेदवार नेपाली कांग्रेसकी न्यौपानेलाई नेपाली कांग्रेस, एकीकृत समाजवादी, लोकतान्त्रिक समाजवादी र राष्ट्रिय जनमोर्चाले समर्थन गरेका थिए । सुरुमा घिमिरेको उम्मेदवारीमाथि मतदान हुँदा उहाँले बहुमत प्राप्त गरेपछि न्यौपानेको उम्मेदवारीमाथि छलफल नै भएन ।
हाल बहाल रहेको २६८ मध्ये बहुमत प्राप्त गरी घिमिरे सभामुखमा निर्वाचित हुनु भएको सभाका ज्येष्ठ सदस्य पशुपतिशमशेर राणाले घोषणा गर्नु भयो । नवनिर्वाचित सभामुख यसअघि २०५६ सालमा राष्ट्रियसभाको सांसद हुनु भएको थियो । एमाले स्थायी कमिटीका सदस्य समेत रहनु भएका उहाँ झापा क्षेत्र नम्बर २ बाट प्रतिनिधिसभामा निर्वाचित हुनु भएको थियो ।
तस्बिरः रत्न श्रेष्ठ-रासस
