काठमाडौंः आइसिसी टी–२० विश्वकप क्रिकेट छनौट अन्तर्गत ओमान विरुद्धको पहिलो खेलमा नेपालले ओमानलाई ३९ रनले पराजित गरेको छ ।नेपालको कसिलो बलिङसामु ओमानको पूरै टिम ७८ रनमै धरासायी भएको थियो ।
इएसपिएनका अनुसार, ओमानको अल अमिरात खेल मैदानमा टस जितेर पहिले ब्याटिङको निम्तो पाएको नेपालले निर्धारित २० ओभरमा आठ विकेट गुमाएर ११७ रन बनाएको थियो ।
नेपालका लागि आरिफ सेखले ३८, लोकेश बमले १६, कप्तान सन्दिप लामिछानेले १६ तथा ज्ञानेन्द्र मल्लले १५ रन बनाएका थिए । अन्य खेलाडीहरु कुशल भुर्तेलले ५, आसिफ सेखले ४, दिपेन्द्र सिंह ऐरीले ११, बिबेक यादवले ७, कमल ऐरीले १ रन बनाएर आउट भएका थिए ।
नेपालले स्कोरबोर्डमा ६ रन हुँदा आसिफ सेखलाई गुमाएको थियो भने १२ रनमा कुशल भुर्तेल, ३३ रन हुँदा ज्ञानेन्द्र मल्ल, ४० रन हुँदा दिपेन्द्र सिंह ऐरीलाई गुमाएर शुरु देखि नै नेपाली टिम दबाबमा परेको थियो ।
ओमानका लागि खबार अलिले ३ र बिलाल खानले २ विकेट लिएका थिए ।
जितका लागि ११८ रन पछ्याएको ओमानले पनि लगातार अन्तरालमा विकेट गुमाएको थियो । स्कोरबोर्डमा ३५ रन हुँदा ओमानले ६ विकेट गुमाइसकेको थियो, र पूरै टिम १७ ओभरमा ७८ रन मात्र बनाएको थियो ।
नेपाली बलर जितेन्द्र मुखिया र अविनाश बोहराले एकएक, दिपेन्द्र सिंह ऐरी र कप्तान सन्दीप लामिछानेले दुईदुई तथा कमल ऐरीले तीन विकेट लिएका थिए । एक विकेट रन आउटका रुपमा प्राप्त भएको थियो ।
समूह बी मा नेपाल सहित क्यानडा, ओमान, फिलिपिन्स रहेका छन् । आजै क्यानडा र फिलिपिन्सबीच खेल भइरहेको छ । यस खेलमा क्यानडाले पहिले ब्याटिङ गरेर २० ओभरमा १ विकेट गुमाएर २१६ रनको विशाल स्कोर खडा गरेको छ जसमा म्याथ्यू स्पूर्सले ६६ बलमै अविजित १०८ रन बनाएका थिए ।
समूह ए मा भने युनाइटेड अरब इमिरेट्स, आयरल्यान्ड, जर्मनी र बहराइन रहेका छन् ।
