काठमाडौं । नेकपा एकीकृत समाजवादीका अध्यक्ष माधवकुमार नेपालले इमानदार कम्युनिष्टहरुलाई एकबद्ध बनाएर हातेमालो गर्दै अघि बढ्ने बताएका छन् । नेता घनश्याम भुसाललाई पार्टीमा स्वागत गर्दै उनले नयाँ ढंगबाट पार्टीलाई पुनर्गठन गर्दै अघि बढ्ने बताएका हुन् ।
अध्यक्ष नेपालले कम्युनिष्ट आन्दोलनमा भएका विकृतिलाई सुधार गर्ने अठोटका साथ अघि बढ्नुपर्ने बताएका छन् । उनले भने, ‘हामीले हाम्रो पार्टी बनाएरमात्रै पुग्दैन। सिंगो नेपालको कम्युनिष्ट आन्दोलनलाई अगाडि बढाउनुपर्छ । कम्युनिष्ट आन्दोलनमा भएका विकृतिलाई सुधार गर्ने अठोटका साथ अघि बढ्छौं । त्यसकारण नयाँ आशा जागेको छ ।’
उनले हाम्रो पार्टी, राम्रो पार्टी, नेकपा एस भन्ने गीतको स्मरण गर्दै पार्टीलाई नयाँ उचाइमा पुर्याउने अभियानमा नेता भुसाल जोडिएकोमा खुशी व्यक्त गरे ।
उनले पुरानै विचार र सिद्धान्तले नेकपा एमाले नसुध्रिने टिप्पणी गरे । उनले भने, ‘उही विचार र सिद्धान्तले पुरानो पार्टी सुध्रिनेवाला छैन भन्ने निष्कर्षमा हामी पुग्यौं । अहिले घनश्यामजी पुग्नुभयो । अरु पनि पुग्दै जानुहुन्छ । उहाँहरुलाई हाम्रो पार्टीमा स्वागत गर्छौं ।’
