काठमाडौं । नेपाली क्रिकेट टीमका पूर्वकप्तान सन्दीप लामिछाने धरौटीमा रिहा भएका छन् । उच्च अदालत पाटनले धरौटीमा रिहा गर्न आदेश दिएबमोजिम धरौटी तिरेर सन्दीप केन्द्रीय कारागारबाट रिहा भएका हुन् ।
जिल्ला अदालत काठमाडौंले सन्दीपलाई थुनामै राखेर कारबाही गराउन आदेश गरेपनि सोविरुद्ध उनले उच्च अदालत पाटनमा निवेदन दिएका थिए । जिल्ला अदालतको उक्त आदेश बदर गर्दै न्यायाधीश ध्रुवराज नन्द र रमेश ढकालको संयुक्त इजलासमा बिहीबार सन्दीपलाई २० लाख धरौटीमा रिहा गर्न उच्च अदालतले आदेश दिएको थियो ।
लामिछानेका वकिल सरोजकृष्ण घिमिरेका अनुसार अब उनले बाहिर बसेर मुद्दाका बाँकी प्रक्रिया पूरा गर्नेछन् । लामिछानेलाई धरौटीमा रिहा गर्ने आदेश गर्दा अदालतले उनलाई विदेश जान रोक लगाएको छ । साथै पीडित र मुद्दाबारे कुनै सामग्री प्रकाशन गर्न वा विद्युतीय सार्वजनिक सञ्चारमाध्यम, सामाजिक सञ्जालमा कुनै टीकाटिप्पणी गर्न निषेध गरेको छ ।
यस्तै उच्च अदालतले पीडितको परिवारसँग भौतिक वा अन्य कुनै प्रकारले सम्पर्क वा भेटघाट गर्न पनि लामिछानेमाथि बन्देज लगाएको छ । लामिछानेलाई उपत्यका छाड्नसमेत रोक लगाइएको छ ।
किशोरी बलात्कार गरेको आरोपमा सन्दीप गत असोज २० गते त्रिभुवन अन्तर्राष्ट्रिय विमानस्थलबाट पक्राउ परेका थिए ।
