काठमाडौँ । जनता समाजवादी पार्टी (जसपा) र नेकपा (एकीकृत समाजवादी) बीच एकता वार्ता हुने भएको छ । एकताका लागि दुवै पक्षले गठन गरेको कार्यदलबीच वार्ता हुन लागेको हो ।
कार्यदलमा एकीकृत समाजवादीका महासचिव बेदुराम भुसालसहित नेताहरु विजय पौडेल, गंगालाल तुलाधर र प्रकाश ज्वाला रहनुभएको छ । त्यस्तै जसपाबाट नेताहरु राजेन्द्र श्रेष्ठ, रकम चेम्जोङ र गोविन्द चौधरी कार्यदलमा हुनुहुन्छ ।
एकीकृत समाजवादी नेकपा (एमाले) बाट अलग भएर माधव नेपाल नेतृत्वमा गठन भएको हो । गत मंसिर ४ को संसदीय निर्वाचनमा प्रतिनिधिसभामा एकीकृत समाजवादीले १० सिट हासिल गरेको थियो । यद्यपि उसले थ्रेसहोल्ड कटाउन नसक्दा राष्ट्रिय पार्टीको मान्यता पाउन सकेन ।
त्यस्तै उपेन्द्र यादव नेतृत्वको जसपाले संसदीय निर्वाचनमा प्रतिनिधिसभातर्फ १२ सिट ल्याएको छ । उसले प्रत्यक्षतर्फ ७ र समानुपातिकतर्फ ५ सिट ल्याएको छ ।
दुवै पार्टीबीच एकता भए नयाँ बन्ने पार्टीमा कुल २२ सांसद हुनेछन् र प्रतिनिधिसभामा चौथो ठूलो दल बन्नेछ ।
