काठमाडौँ । काठमाडौँमा जारी पहिलो संस्करणको नेपाल टी–ट्वान्टी लिग अन्तर्गत ईलिमिनेटर खेलमा जित निकाल्दै विराटनगर सुपर किंग्सले दोस्रो क्वालिफायर खेल्ने भएको छ । काठमाडौंलाई ९९ रनले पराजित गर्दै विराटनगरले दोस्रो क्वालिफायर खेल्ने अवसर पाएको हो ।
टियु मैदानमा भएको खेलमा विराटनगरले दिएको १ सय ८३ रनको लक्ष्य पछ्याएको काठमाडौंले १२.४ ओभरमा अलआउट हुँदै ८३ रन मात्र बनायो । काठमाडौंका लागि अविनाश बोहोराले ४ बलमा अविजित १६ रन बनाउँदा कप्तान ज्ञानेन्द्र मल्लले १५ रन बनाए ।
विराटनगरका लागि सुर्य तामाङले ४ तथा कियोन जोसेफ र साहब आलमले समान २/२ विकेट लिए ।
त्यसअघि पहिले ब्याटिङ गरेको विराटनगरले २० ओभरमा ६ विकेट गुमाएर १ सय ८२ रन बनायो । विराटनगरका लागि कप्तान रोहित पौडेलले ४९ बलमा ६१ रन बनाए । उनले ६ चौका र २ छक्का प्रहार गरे । रोहितले हुसेन तलतसँग मिलेर ९८ रनको साझेदारी गरेका थिए । विवेक यादवले १८ बलमा अविजित ४६ रन जोडे । यस्तै, हुसेन तलतले २३ बलमा ३८ रन बनाउँदा राज नाननले १७ बलमा १३ रन जोडे ।
काठमाडौंका लागि अनिल खरेल र कमल सिंह ऐरीले समान २-२ तथा अविनाश बोहोराी र गौतम केसीले समान १–१ विकेट लिए ।
आजको इलिमिनेटर खेलको बिजेता विराटनगरले फाईनलमा स्थान बनाउनका लागि आईतबार भएको पहिलो क्वालिफायरमा पराजित जनकपुर रोयल्ससँग फाईनल प्रवेशका लागि खेल्नेछ । पराजित काठमाडौं भने प्रतियोगिताबाट बाहिरिएको छ ।
आईतबार भएको पहिलो क्वालिफायरमा विजयी भएको लुम्बिनी अल स्टार फाईनलमा प्रवेश गरिसकेको छ । यस लिगको विजेताले ५५ लाख तथा उपविजेताले ३० लाख नगद पुरस्कार प्राप्त गर्दा तेस्रो हुनले १० लाख र चौंथोले ५ लाख पाउने छ ।
