काठमाडौं । राष्ट्रिय स्वतन्त्र पार्टीका सभापति एवम् उपप्रधानमन्त्री तथा गृहमन्त्री रवि लामिछानेले मुलुकमा कुनै पनि कालखण्डमा भएको भ्रष्टाचारबारे सरकार निर्मम ढंगले प्रस्तुत हुने बताउनु भएको छ ।
सोमबार प्रतिनिधिसभाको पहिलो बैठकमा बोल्दै उहाँले भ्रष्टाचार र अपराधिक गतिविधिमा संलग्नहरुलाई छुटाउनका लागि कुनै पनि दवाव र प्रभाव पार्ने काम आफूलाई नगर्न पनि आग्रह गर्नु भयो । उहाँले आफू र आफ्नो दलमा सम्वद्ध सांसदहरुले भ्रष्टाचारलगायतका नागरिकहरुलाई दुःख दिने कुनै पनि काम नगर्ने र गरिहाले उनीहरुमाथि कडा कारबाही गर्ने प्रतिवद्धता समेत व्यक्त गर्नु भयो ।
वर्तमान सरकारको आफ्नो कार्यकाल सफल हुने र त्यसलाई सफल बनाउनका लागि आफू र आफ्नो पार्टीले इमान्दारिताका साथ योगदान पु¥याउने दावी समेत गर्नु भयो । उपप्रधानमन्त्री लामिछानेले आफू र आफ्नो दलले गल्ती गरे पदमा टाँसिएर बसिरहने पक्षमा नरहेको पनि पटकपटक दोहो¥याउनु भयो । सरकार गठनका बेला सत्तासाझेदार एमाले र माओवादी नेतृत्वबाट आएको प्रतिवद्धताबाट आफूहरु हौसिएको उल्लेख त्यसलाई पालना गरेर सर्वसाधारणको जीवनमा परिवर्तन ल्याउन नसकिए सरकारबाट आफ्नो पार्टी बाहिरिने उहाँको भनाई थियो । उपप्रधानमन्त्री लामिछानेले आफ्नो पार्टीले आम नागरिकको आशाको दियोलाई निभ्न नदिने दृढता समेत व्यक्त गर्नु भयो ।
उहाँले भन्नु यो, ‘सरकारका प्राथमिकताहरुलाई मध्यनजर गर्दै आफूले सम्हालेको मन्त्रालयमा केही कामहरुको सुरुवात भईसकेका छन । जसले आम जनजीवनलाई सकारात्मक प्रभाव पार्नेछ । यस सम्मानित संसदमा गृह मन्त्रालय सम्हालेको एक जिम्मेवार मन्त्रीको रुपमा पनि र सांसदको रुपमा पनि र जनप्रतिनिधिको रुपमा पनि एउटा कुरा मैले भन्नै पर्ने हुन्छ कि हामी जनप्रतिनिधिहरु यदि जिम्मेवार हुन सक्यौ भने सरकारलाई आफ्नो न्यूनतम साझा कार्यक्रम पूरा गर्न निकै ठूलो मद्दत पुग्नेछ । हामीले सुन्नुपर्ने आम सर्वसाधारणको गुनासो हो । हामीले थाहा पाउनुपर्ने आम सर्वसाधारणको पीरमर्का हो । हामीले हल गर्नुपर्ने समस्या आम सर्वसाधारणके हो ।
तर हामी आफ्नै समस्याहरुमा, पीरमर्काहरुमा अल्झियौं, आफ्नै तानातानीमा अल्झियौ र ठूलो संख्यामा नागरिकहरु त्यसबाट छुटने अवस्था नहोस भन्नका लागि यहाँहरुमाझ म आग्रह गर्न चाहन्छु–कुनै पनि भ्रष्टाचारको विषयमा भएको छानवीन वा अनुसन्धानमा यहाँहरुले प्रभाव नपारी दिनुहोला । कुनै पनि अपराधिक गतिविधिमा यदि छानवीन भईरहेको छ भने त्यसलाई प्रभाव पार्नको निमित्त आफ्ना मान्छेहरु छुटाउनु प¥यो भन्ने किसिमका दवाव सृजना नगरिदिनु होला । यदि जे हो त्यही गर्ने, नीति, नियमलाई पालना गर्ने, ल एण्ड अर्डरलाई पालना गर्ने हो भने त्यसको सूरुवात यो गरिमामय संसदमा उपस्थित हामी सबैबाट हुनु पर्दछ । र, म छातीमा हात राखेर यो गरिमामय संसदमा भन्न चाहन्छु–म र म सम्वद्ध दलका कुनै पनि प्रतिनिधिहरुबाट, सांसदहरुबाट कुनै पनि किसिमको अनियमितता हुने छैन ।
कहीँकतै नागरिकलाई दुःख दिने काम हुने छैन । कुनै काण्डहरुमा हामी मुछिने छैनौं । म बाचा गर्न चाहन्छु–हामी मुलुक र मुलुकबासीका लागि हामीले हिजो गरेका बाचाहरु पूरा गर्नका लागि तयार भएर आएका छौं । कुनै पनि दिन तपाईहरुले हामीलाई साथ दिएका कारणले, हाम्रा सांसदहरुका कारणले शीर झुकाउनुपर्ने छैन । मेरो दलका कुनै पनि सांसदहरुले कुनै पनि किसिमको अनियमिततामा आफूलाई सहभागिता गराउने छैनन् । यो बाचा र जिम्मेवारी म यो गरिमामय संसदको गरिमामय रोष्टममा उभिएर छातीमा हात राखेर भन्न चाहन्छु । हामी कुनै पनि किसिमको अनियमितताको काम हामीबाट हुनेछैन । भएको खण्डमा निर्ममभन्दा निर्मम सजाय दिन तयार भएको बाचा आज यहाँ छातीमा हात राखेर मैले गर्न चाहेको कुरा यहाँ राख्न चाहेको छु । हामीले गरेको राजनीतिले आम सर्वसाधारणलाई छुनुपर्ने हो । तर आम सर्वसाधारणको जीवनमा हामीले गरेको राजनीतिले कति छोयो, कति छोएन ? त्यो चाँही निर्मम समीक्षा गर्नु पर्नेछ । र, सरकारमा सहभागी हुने हाम्रो यो निर्णयमा विशेष गरेर दुई ठूला राजनीतिक दलका शीर्ष नेताहरुज्यूको बैठकमा जुन प्रतिवद्धता उहाँहरुबाट व्यक्त भयो, त्यसबाट हामी हौसिएका छौं ।
कुनै पनि किसिमको दवाव र प्रभावमा नपरी जनताले महसुश गर्ने गरी काम गर्न हामी प्रतिवद्ध छौ, कटिवद्ध छौं भनेर जुन विश्वास दुई शिर्ष नेताज्यूहरुले गर्नु भएको छ, त्यो विश्वासमा हामी अडिएका छौं । त्यो एउटा राजनीतिक दलहरुले अर्को राजनीतिक दललाई गरेको विश्वासको रुपमा मात्र होइन, सरकार बनाउनका लागि जोडिएको हिसाव मात्रै होइन, यो हिसाव नेपाली जनताले खोज्नेछन । त्यो हिसाव नेपाली जनतालाई बुझाउनका निमित्त यस पटक कुनै कसर बाँकि राख्ने छैनौं भनेर शीर्ष नेताज्यूहरुबाट जुन वचनवद्धता आएको छ । यो बचनवद्धताले काम गर्नेछ । र, नेपाली नागरिकले महसुस गर्न सक्नेगरी सरकार अगाडि बढन सक्नेछ ।
यस अर्थमा सरकारमा हाम्रो सहभागिता त्यस अर्थमा रहेको छ । हाम्रो तर्फबाट यो प्रतिवद्धतामा कुनै कमीकमजोरी आएको खण्डमा सरकारमा, लोभमा वा पदमा टाँसिरहने छैनौं । यो बाचा पनि म सम्माननीय प्रधानमन्त्रीज्यूलाई यही रोष्टमबाट गराउन चाहन्छु । हामी आफ्नो कर्तव्य पूरा गर्ने शिलशिलामा कहीँकतै चुक्यौ भने पद र कुर्सीको लोभमा झुण्डिने छैनौं । यसमा यहाँहरु निर्धक्क हुनुहोला । सत्ता साझेदार दलहरुलाई म यो बाचा पनि गर्न चाहन्छु । अन्त्यमा, गरिमामय यो संसदमा आउनुको पछाडि आम सर्वसाधारण नागरिकहरुको अपेक्षा छ, माया छ । विश्वास छ । त्यो विश्वासको दियोलाई हामी कहिल्यै निभ्न दिने छैनौं, चाहे जतिसुकै ठूलो आँधिहुरी आओस् । त्यो दियोलाई बाली राख्ने छौं । जोलाई राख्नेछौं । सरकारको कार्यकाल पूर्ण रुपमा सफल हुनेछ भन्ने कुरामा विश्वस्त हुने र त्यसमा आफ्नो तर्फबाट इमान्दार योगदान दिने बाचा गर्दै विदा हुन्छु, धन्यवाद ।’
उपप्रधानमन्त्री लामिछानेले जनमतलाई सम्मान गरेर आफ्नो पार्टी सरकारमा सहभागी भएको बताउनु भयो । जनमत अनुसार सरकार बनेको र जनताको अपेक्षा अनुसार काम हुने गरी सरकारले केही दिनमै साझा न्यूनतम कार्यक्रम ल्याउने तयारी गरिरहेको उहाँको भनाई थियो । उपप्रधानमन्त्री लामिछानेले जनमतको सम्मान गर्दै आफूहरु सरकारमा गएको र उनीहरुसँग गरिएको बाचा पूरा गर्न लागि पर्ने समेत बताउनु भयो । उहाँले भन्नु भयो, ‘पार्टीको रुपमा एउटा नयाँ पार्टीको उदय नेपालको राजनीतिक इतिहासमा त्यति ठूलो कुरा होइन होला । तर जुन समयावधि भित्र हामीले विश्वास प्राप्त गरेका छौ ं। त्यो विश्वास एउटा दललाई अथवा त्यस दलका कुनै उम्मेदवारलाई कसैले दिएको मत मात्रै होइन । अव यो मुलुकमा परिवर्तन आवश्यक छ भन्ने र नेपाली जनताहरुले ब्यूताएका घण्टीको ध्वनी हो । यो ध्वनीलाई सम्मानित संसदले सुन्ने छ, सिंगो देशले सुन्नेछ । र, यो संसदले नेपाली जनताको हितका लागि र मुलुकको हितका लागि त्यसलाई सदूपयोग गर्नेछ भन्ने म विश्वास राख्न चाहन्छु ।
हामीलाई लाग्ने गरेको शंका भनौं अथवा लाञ्छना छ कि तपाईहरुले प्राप्त गर्नु भएको मत निराशाको मत हो भन्नु भएको छ । तर म यसलाई निराशाको मत होइन, देशलाई नेपाली जनताले दिनु भएको आशाको मत हो भन्न चाहन्छु । यो आशाको मत केवल हाम्रो दलका लागि मात्र होइन, यो आशाको मत सम्पूर्ण राजनीतिक दलहरुमाथि फेरी पनि गरिएको आशाको मत हो । म त्यसैगरी बुझ्न पनि सबैलाई अनुरोध गर्न चाहन्छु । नेपाली जनताले यस पटक जानेर वा नजानेर असाध्यै राम्रो मतदान गरेको हामीले पाएका छौं । हामी जस्ता नयाँ राजनीतिक दललाई पनि नमात्तिने गरी त्यत्ति संख्यामा मत दिनु भएको छ । र, पूराना राजनीतिक दलहरुलाई पनि अव त सच्चिनु पर्छ होला है भन्ने गरी घटाई दिनु भएको छ । त्यसकारण यस अर्थमा पनि केही सचेत गराउने गरी आएको यो मतलाई हामीले स्वागत गर्नु पर्दछ भन्ने म ठान्दछु । जनमत अनुसार सरकार बनेको कुरा पटकपटक सम्मानीय प्रधानमन्त्रीज्यूले भन्नु भएको कुरा म यहाँ स्मरण गर्न चाहन्छु । यस पटक आम नेपाली जनताले जस्तो जनमत दिनु भएको थियो । त्यही जनमत अनुसारको सरकार बनेको छ । हुनत लामो समयदेखि मुलुक प्रतिपक्षविहीन भएको कुरा चुनाव अगाडि हामीले उठाउँदै आएको विषय हो ।
प्रतिपक्षविहीन संसद भयो पनि भन्ने अनि मौका पाउनसाथ सरकारमा प्रवेश गरिहाल्ने भन्ने प्रश्न पनि हामी माझ उभिएको छ । तर वास्तविकता त्यस्तो होइन । यस पटक नेपाली नागरिकले दिएको मतको सम्मान गर्दै साझा न्यूनतम साझा कार्यक्रममार्फत् सम्बोधन गर्नेगरी जसरी सरकार बनेको छ । त्यो नै जनमतको सच्चा कदर हो । जनमतको सम्मान हो भन्ने हामीलाई लागेको छ । त्यसै अनुसार यस पटक सरकार बनेको हो भन्ने मैले ठानेको छु । न्यूनतम साझा कार्यक्रममार्फत् हामीले कम्तिमा पनि जनजीविकाका सवालमा निर्मम भएर अगाडि बढने जुन बाचा गरेका छौं । त्यसलाई इमान्दारितापूर्वक हामीले पूरा गर्न सक्यौ भने जनताले महसुश गर्ने गरी परिवर्तन यो देशमा आउनेछ भन्ने कुरामा हामी निर्धक्क भएका छौं । यो न्यूनतम साझा कार्यक्रमले जनजीविकाका सवालमा खरो भएर काम गर्नेछ । जसको सार्वजनिकीकरण हामी छोटो समय भित्र गर्ने तयारीमा छौं ।’
उपप्रधानमन्त्री लामिछानेले जनताको चाहना अनुसार सरकारलाई अघि बढाउन रचनात्मक सुझाव दिन प्रतिपक्ष दलहरुलाई पनि आग्रह गर्नु भयो । उहाँले जनताको अपेक्षा अनुसार काम नभए मुलुकमा निराशा छाउने भएकाले त्यसो हुन नदिन संसद र सबै राजनीतिक दलहर सचेत रहनु पर्ने बताउनु भयो । उपप्रधानमन्त्री लामिछानेले नेपाली जनताले विगतमा भएको बेथितिबाट मुक्ति चाहेकाले सरकार त्यसको अन्त्य गर्न लागि परेको बताउनु भयो । उहाँले भन्नु भयो, ‘संसद प्रतिपक्षको हो । प्रतिपक्ष दलले रचनात्मक रुपमा सुझाव, सल्लाह दिन सकेको खण्डमा सरकारले त्यो खवरदारीलाई आत्मासात गर्दै जनताको चाहना अनुरुपको कार्यहरु गर्न अगाडि बढनेछ ।
म यो अपेक्षा पनि गर्दछु कि प्रतिपक्ष दलबाट अडकाउने होइन, सघाउने काम हुनेछ भन्ने कुरा पनि म आशा गर्न चाहन्छु । सबैभन्दा महत्वपूर्ण कुरा हामी जस्ता नयाँ राजनीतिक दलहरुको आगमनको कुरा यो जनताको अपेक्षा अनुसार भएको आगमन हो । त्यो अपेक्षामा कुनै कारणले कुठाराघात भयो भने एउटा चरम निराशामा मुलुक जानेछ । यस कुराको हेक्का हामी छ । र, सम्पूर्ण राजनीतिक दलहरुलाई पनि छ होला । नभए पनि भयो होला भन्ने मैले अपेक्षा गरेको छु । यस अगाडि यो मुलुकमा भएका तमाम बेथितिहरु, त्यसको जवाफदेहिता नेपाली जनताले खोजेका छन । आज संविधान प्राप्त भईसकेपछि दोस्रो पटक यो संसद अधिवेशनको पहिलो दिनमा हामीले भन्नैपर्छ–वर्षौदेखि भ्रष्टाचारका विभिन्न काण्ठहरु मच्चाएको र जनता निराश भएको अवस्थामा के अवको संसदले त्यो भारी बोकिरहन्छ कि त्यो भारीलाई बिसाउँछ ? र, भ्रष्टाचारको सम्पूर्ण पुराना फाईलहरु खोल्नका लागि ऐक्यवद्धता कायम गर्छ ? मलाई विश्वास छ लिखित रुपमा हामीले साझा न्यूनतम कार्यक्रममार्फत कुनै पनि कालखण्डका भएका भ्रष्टाचारको निर्मय छानवीन गर्ने भन्ने कुरा त्यस भित्र एउटा बूँदाको रुपमा राखेका छौं । त्यसलाई इमान्दारिताका साथ पालना गर्नेछौं ।
जनमतको सच्चा सम्मान त्यतिखेर हुनेछ, जुन लिखित रुपमा हामीले गरेका बाचा हामी विशेष गरेर अहिले सत्ता साझेदार दलहरुबाट बनेको सरकार सक्षम हुनेछ । हामी त्यो घडीको प्रतिक्षामा छौं भन्ने कुरा आम नागरिकलाई हामीले बताउनै पर्नेछ । अर्थात् कुनै पनि कालखण्डमा भएका भ्रष्टाचार, त्यसका विरुद्धमा सरकार निर्मम भएर खडा हुन्छ । आज यो गरिमामय संसदमा यो कुराको जानकारी स्वदेश, विदेश जहाँ रहेर पनि हेरिरहनुभएका सम्पूर्ण आम नागरिकहरुलाई हामीले बताउनै पर्ने हुन्छ । ’
उपप्रधानमन्त्री लामिछानेले आफूले सम्हालेको मन्त्रालयमा सुधारका संकेत देखिएको दावी गर्दै त्यसमा साथ दिन पनि सबै पक्षको गम्भिर ध्यानाकर्षण गराउनु भयो ।
