एजेन्सी । स्पेनिस फुटबल ला लिगा अन्तर्गत बार्सिलोनाले जित निकालेको छ । गएराति भएको खेलमा बार्सिलोनाले एट्लेटिको मड्रिडलाई उसकै घरेलु मैदानमा १–० गोलले पराजित गरेको हो ।
बार्सिलोनालाई जित दिलाउन एकमात्र निर्णायक गोल खेलको २२ औं मिनेटमा ओस्माने डेम्बेलेले गरे । पेड्री र गाभीको कम्बिनेसनमा डेम्बेलेले गोल गर्न सफल रहे । पेड्रीले गाभीलाई पास दिलाए र गाभीले मार्कमा रहेका डेम्बेलेतर्फ बल उपलब्ध गराए । डेम्बेलेले अवसर खेर जान दिएनन् ।
प्रतिस्पर्धात्मक बनेको खेलको अन्तिमतिर दुबै टिमका एक–एक खेलाडीले रातो कार्ड पाए । बार्सिलोनाका फेरान टोरेस र एट्लेटिकोका स्टेफान साभिचबीच मैदानमै एकअर्कामाथि बलजफ्ती गर्दै लडेपछि रेफ्रीले दुबैलाई रातो कार्ड देखाए ।
जितसँगै शीर्ष स्थानमा रहेको बार्सिलोनाले दोस्रो स्थानको रियल मड्रिडसँग ३ अंकको दुरी बढाएको छ । १६ खेलबाट बार्सिलोनाको ४१ अंक छ । यता पराजित एट्लेटिको समान खेलबाट २७ अंकसहित पाँचौं स्थानमा छ ।
