काठमाडौं । पहिलो संस्करणको नेपाल टी–२० लिगको पहिलो क्वालिफायरमा लुम्बिनी अल स्टारले जनकपुर रोयल्सलाई जितको लागि १ सय ४४ रनको लक्ष्य दिएको छ ।
किर्तिपूरको टियू मैदानमा भएको खेलमा टस हारेर पहिले ब्याटिङ गरेको लुम्बिनीले २० ओभरमा ८ विकेट गुमाएर १ सय ४३ रन बनायो । लुम्बिनीका लागि ईशान पाण्डेले ३८ रन बनाए भने अनिल शाहले २४ रन बनाए । विपुल शर्माले २० रन बनाउँदा श्याड्ली भान १७ रनमा अविजित रहे । यस्तै लाहिरु मिलान्थाले १६ रन बनाए ।
जनकपुरका लागि बलिङ गरेका जितेन्द्र मुखिया,असन प्रियरन्जन र सोमपाल कामीले समान २/२ विकेट लिए भने पवन सराफ र ट्राभोन ग्रिफिथले समान १/१ विकेट लिए ।
आजको बिजेताले फाईनलमा सिधै स्थान बनाउँने छ भने पराजित हुने टोलीले सोमबार हुने ईलिमेटर खेलको बिजेतासँग फाईनल प्रवेशका लागि खेल्नेछ ।
लुम्बिनी र जनकपुरले यस लिगको समूह चरणमा भएको दुई खेलमा एकआपसविरुद्ध १/१ खेल जितेका छन् ।
यस लिगमा काठमाडौं नाइट,पोखरा एभेन्जर्स,फार वेस्ट युनाईटेड,जनकपुर रोयल्स,विराटनगर सुपर किंग्स र लुम्बिनी अल स्टार रहेका छन् ।
