काठमाडौं । सहिद स्मारक ‘ए’ डिभिजन लिग फुटबल प्रतियोगिताको लागि १४ क्लबले नाम दर्ता गराएका छन् । फागुन १९ गतेबाट सुरु हुने शीर्ष डिभिजनको लिगमा १४ वटै क्लबले नाम दर्ता गराएको अखिल नेपाल फुटबल संघ (एन्फा) ले जनाएको छ ।
एन्फाले लिगको लागि क्लब दर्ताको अन्तिम मिति आज शुक्रबारसम्म तोकेको थियो । शुक्रबार नाम दर्ता गराउने क्लबमा मनाङ मर्स्याङ्दी क्लब, खुमलटार युथ क्लब र सातदोबाटो युथ क्लब रहेको छ । यसअघि बिहीबारसम्म ११ क्लबले नाम दर्ता गराइसकेको एन्फाले बतायो ।
यस अघि चर्च ब्वाइज युनाइटेड, त्रिभुवन आर्मी फुटबल क्लब, एपीएफ फुटबल क्लब, मच्छिन्द्र फुटबल क्लब, जावलाखेल युथ क्लब, फ्रेन्ड्स क्लब, हिमालयन शेर्पा, थ्री स्टार क्लब, संकटा क्लब, न्यूरोड टिम (एनआरटी) र नेपाल पुलिस क्लबले नाम दर्ता गरेका थिए ।
एन्फाले दर्ता भएका सबै क्लबलाई तयारी खर्चको पहिलो किस्ताबापत १५ लाख रुपैयाँ उपलब्ध गराएको छ । यसअघि नै एन्फाले लिगको तयारीका लागि ‘ए’ डिभिजनका प्रत्येक क्लबलाई ३२ लाख ५० हजार रुपैयाँ उपलब्ध गराउने बताएको थियो ।
‘ए’ डिभिजन लिग विजेताले ७५ लाख , दोस्रो टोलीले ५० लाख र तेस्रो हुने टोलीले २५ लाख रुपैयाँ पाउनेछन् । यस्तै, फेयर प्ले अवार्डको नगद पुरस्कार ३ लाख तोकिएको छ । मोस्ट भ्यालुएबल खेलाडीले ३ लाख, सर्वाधिक गोलकर्ता र सर्वोत्कृष्ट गोलकिपरले २ लाख र इमर्जिङ प्लेयरले १ लाख ५० हजार रुपैयाँ पाउने छन् ।
यस्तै, प्रत्येक खेलको विजेता क्लबले म्याच मनीवापत ५० हजार रुपैयाँ प्राप्त गर्नेछन् । बराबरी भएका दुई क्लबबीच रकम बराबर बाँडिनेछ भने हरेक खेलको म्यान अफ द म्याचले १० हजार रुपैयाँ पाउनेछन् ।
