काठमाडौं । क्रिकेटर सन्दीप लामिछानेले काठमाडौं जिल्ला अदालतको आदेशविरुद्ध गरेको पुनरावेदनका लागि सुनुवाइको पेशी आज तोकिएको छ।
सन्दीपले थुनाबाहिर रहेर मुद्दा लड्न पाउनुपर्ने माग गर्दै जिल्ला अदालतको आदेशविरुद्ध पाटन उच्च अदालतमा उजुरी दर्ता गराएका थिए । सोहि पुनरावेदनको सुनुवाइका पेशी तोकिएको हो।
यसअघि दुई पटक पेशी तोकिए पनि दुबै पटक पेशी रोकिएको थियो । पहिलो पेशी सन्दीपका कानुन व्यवसायीले स्थगित गरेका थिए भने दोस्रोमा हेर्न नभ्याइनेमा परेको थियो।
बलात्कारको आरोपमा असोज २० गते पक्राउ परेका सन्दीपलाई काठमाडौं जिल्ला अदालतले फैसला नहुँदासम्मका पुर्पक्षको लागि थुनामा पठाउने आदेश जारी गरेको थियो। सन्दीप हाल केन्द्रीय कारागारमा रहेका छन् ।
पछिल्लो समय उनको न्यायको लागि क्रिकेटर शरद भेषावकर, आरिफ शेखलगायतले सामाजिक सञ्जालमा आवाज उठाएका छन् ।
