काठमाडौँ । नेपाल टी–२० लिग क्रिकेटअन्तर्गत आज मङ्गलबारको दोस्रो खेलमा लुम्बिनी अल स्टार्सले जित निकालेको छ ।
त्रिवि मैदानमा सम्पन्न खेलमा लुम्बिनीले जनकपुर रोयल्सलाई पाँच रनले हराएको हो ।
लुम्बिनीले दिएको एक सय ७९ रनको लक्ष्य पछ्याएको जनकपुरले २० ओभरमा पाँच विकेट गुमाएर एक सय ७३ रनमात्रै बनाउन सक्यो ।
जनकपुरका लागि चाडविक वाल्टनले सर्वाधिक ५९ तथा ट्रिभन ग्रिफिथ, सन्दीप जोरा र शराफउद्दिन अशरफले २६/२६ रन बनाए । लुम्बिनीका ह्यारी टेक्टर र विपुल शर्माले दुई/दुई विकेट लिए ।
यसअघि पहिले ब्याटिङ गरेको लुम्बिनीले निर्धारित २० ओभरमा छ विकेट गुमाएर एक सय ७८ रन बनायो । लुम्बिनीका लागि हरमीत सिंहले ७३ र लाहिरु मलिन्थाले ३३ रन जोडे । जनकपुरका शराफउद्दिन अशरफले तीन विकेट लिए ।
यो नतिजासँगै लुम्बिनी आठ खेलमा १४ अङ्कसहित तालिकाको शीर्ष स्थानमा छ । यस्तै, समान खेलमा १० अङ्कसहित जनकपुर दोस्रो स्थानमा छ ।
