काठमाडौं । खेलाडीहरूको असन्तुष्टिका कारण अवरुद्ध भएको नेपाल टी–२० लिग अन्तर्गतको आजको खेल पुनः सुचारु भएको छ ।
नेपाल क्रिकेट संघ (क्यान) र खेलाडीहरुबीचको लामो छलफलपछि निर्धारित समयभन्दा दुई घण्टा ढिला म्याच सुरु भएको हो । पारिश्रमिक नपाएपछि खेलाडीले खेल्न नमान्दा नेपाल टी–२० मा आज हुने खेलहरु अन्योलमा परेको थियो ।
तालिकाअनुसार मंगलबार बिहान ८:३० मा काठमाडौं नाइट्स र विराटनगर सुपर किंग्सबीच टस हुनुपर्ने थियो । तर, दुबै टोलीका खेलाडीहरूले टस गर्न नमानेपछि खेल ढिला भएको हो ।
खेल अवरुद्ध भएपछि क्यानको तर्फबाट महासचिव प्रशान्तविक्रम मल्लले खेलाडीहरूसँग वार्ता गरेका थिए । क्यानले भरेसम्ममा पारिश्रमिक दिलाउने प्रतिबद्धता जनाएको बताईएको छ । महासचिव मल्लले खेलाडीसँग भएको सहमतिबारे केही बेरमा पत्रकार सम्मेलन गरी जानकारी दिने भएका छन् ।
सहमतिपछि काठमाडौं नाइट्स र विराटनगर सुपर किङ्सबीचको खेल ९ ओभरमा छोट्याइएको छ । यस खेलमा काठमाडौंले टस जितेर ब्याटिङ रोजेको छ ।
पोखरा एभेन्जर्सबाहेकअहिलेसम्म कुनै पनि टिमका खेलाडीहरूले पारिश्रमिक नपाएको बताइएको छ ।
