काठमाडौँ । प्रधानमन्त्री पुष्पकमल दाहाल प्रचण्डले विदेशबाट फर्केका नेपालीलाई मोबाइल ल्याउन गरिएको कडाइ तत्काललाई कार्यान्वयन नगर्न निर्देशन दिनुभएको छ । प्रधानमन्त्रीका प्रेस संयोजक सूर्यकिरण शर्माका अनुसार प्रधानमन्त्री प्रचण्डले अर्थमन्त्रीलाई निर्देशन दिनु भएको हो ।
विदेशबाट एकथान मोबाइल ल्याउँदा पनि सरकारले १८ प्रतिशत कर लिन लागेको भन्दै वैदेशिक रोजगारीमा रहेका नेपालीहरुले ‘नो रेमिट्यान्स’ ह्यासट्याग प्रयोग गर्दै विरोध जनाउन थालेपछि प्रधानमन्त्रीले सो निर्देशन दिनु भएको हो ।
मोबाइल ल्याउँदा कर लाग्ने व्यवस्थापछि विदेशमा बस्ने नेपालीहरुले रेमिट्यान्स नपठाउने भनेर सामाजिक संजालमा अभियान चलाउन थालेका छन् ।
भन्सार विभागले विदेशबाट ल्याउने फोनहरूमा कडाई गर्ने बताएको थियो । व्यक्तिले प्रयोग गरिरहेको सहित थप एउटा मोबाइल ल्याएको छ भने दोस्रो मोबाइलको लागि भन्सार विभागलाई १८ प्रतिशत कर अनिवार्य तिर्नु पर्ने व्यवस्था गरेकोमा प्रधानमन्त्रीले यस्तो निर्देशन दिनु भएको हो ।
