काठमाडौँ । विभिन्न व्यक्तिको सुरक्षामा कार्यविधि विपरीत खटिएका सुरक्षाकर्मीलाई ४८ घण्टाभित्र फिर्ता गर्न गृह मन्त्रालयले निर्देशन दिएको छ । उपप्रधान एवं गृहमन्त्री रवि लामिछानेको निर्देशनपछि मन्त्रालयले दुवै सुरक्षा निकायलाई सुरक्षा कार्यविधि विपरीत खटिएका जनशक्तिलाई फिर्ता बोलाउन निर्देशन दिएको हो ।
विशिष्ठ व्यक्तिहरुको सुरक्षा व्यवस्थापन कार्यविधि २०७७ अनुसार बहालवाला तथा पूर्व निश्चित पदाधिकारीहरुलाई मात्रै सेना, प्रहरी र सशस्त्रका अंगरक्षक, सवारी, इन्धनसहितको सुविधा तोकिएको भए पनि सत्ता र शक्ति रहेकाले पहुँचका आधारमा उक्त कार्यविधि मिचेर यस्तो सुविधा दुरुपयोग गर्दै आएका छन् ।
प्रहरी र सशस्त्रका सुरक्षाकर्मी दुरुपयोग गर्ने गृहमन्त्रालयका कर्मचारी पनि संलग्न रहेको बताइएको छ । गृहका कर्मचारीले कार्यविधिले निश्चित गरेको मापदण्ड विपरीत अंगरक्षक र चालक लिएको बताइन्छ ।
