काठमाडौँ । उपप्रधान एवं गृहमन्त्री रवि लामिछानेको सांसदको योग्यताबारे पुस २२ गते सर्वोच्च अदालतको संवैधानिक इजलासमा सुनुवाइ हुने भएको छ ।
यसअघि पुस ६ गते सुनुवाइ हुने भनिए पनि मंगलबार मात्र आदेशको प्रमाणित कपी आएको ओ । अधिवक्ता रविराज बसौलालगायतले सर्वोच्च अदालतमा रिट दायर गर्नुभएको थियो ।
संवैधानिक इजलासमा कायममुकायम प्रधानन्यायाधीश हरिकृष्ण कार्कीसहित न्यायाधीशहरु ईश्वरप्रसाद खतिवडा, आनन्दमोहन भट्टराई, अनिलकुमार सिन्हा र प्रकाशमानसिंह राउत हुनुहुन्छ ।
गृहमन्त्री लामिछाने सांसद हुन योग्य कि अयोग्य भन्ने विषयमा पुस २२ गते दुवै पक्षका कानून व्यवसायीले बहस गर्नेछन् । त्यसपछि अदालतले के हुने भन्ने आदेश दिनेछ ।
अमेरिकी नागरिकता लिएपछि निष्क्रिय भएको नेपाली नागरिकता प्रयोग गरेको भन्दै उहाँविरुद्ध मुद्दा परेको हो । रिटमा उहाँलाई सांसद पदको शपथ लिन रोक लगाउनुपर्ने र राष्ट्रिय स्वतन्त्र पार्टीको सभापति पद खारेज गर्नुपर्ने माग गरिएको छ ।
