काठमाडौँ । नेकपा (माओवादी केन्द्र) का केन्द्रीय सदस्य एवं पार्टी अध्यक्ष पुष्पकमल दाहाल प्रचण्डका अति विश्वासपात्र रामप्रसाद सापकोटा दीपशिखाले सत्ता गठबन्धन भत्किएको संकेत गर्नुभएको छ ।
सामाजिक सञ्जाल फेसबुकमा पोस्ट गर्दै उहाँले राजनीति नयाँ कोर्षमा गएको भन्दै माओवादी पुनः प्रतिपक्षमा बस्न सक्ने बताउनुभयो ।
उहाँले सत्ताको मात अन्धो रहेछ भन्दै हिजो जसरी वाम भत्किए आज कांग्रेस पनि भत्किन खोजेको बताउनुभयो ।
सत्ता गठबन्धनको प्रधानमन्त्री निवास बालुवाटारमा भएको बैठकमा करिब दुई घण्टा छलफल गरेर माओवादी प्रचण्ड बाहिरिनुभए लगत्तै दीपशिखाको यस्तो धारणा आएको हो ।
नेता दीपशिखाले फेसबुकमा राखेको टिप्पणीले गठबन्धनको बैठकमा कुनै सहमति हुन नसकेको संकेत गरेको छ ।
