काठमाडौँ । सर्वोच्चको संवैधानिक इजलासले बुधबार प्रतिनिधिसभा र प्रदेशसभा सदस्य निर्वाचनमा भएका विवादहरुलाई सुनुवाइ गरेको छ । चुनावी परिणाममा असन्तुष्ट नेताहरुले चुनावमा धाँधली भएको, मतगणना दोहोर्याउनुपर्ने लगायतमा माग गर्दै सर्वोच्चमा निवेदन दिएका थिए ।
राष्ट्रिय स्वतन्त्र पार्टीका सभापति रवि लामिछानेको भने नागरिकता विवादबारे रिट दायर भएको थियो । उनको नागरिकता विवाद टुंगो नलागेसम्म सांसद पद खारेजीको माग गर्दै सर्वोच्च अदालतमा रिट निवेदन दर्ता भएको थियो । मुद्दाको किनारा नलाग्दासम्म लामिछानेलाई प्रतिनिधिसभा प्रवेशमा पनि रोक लगाउन रिटमा माग गरिएको छ ।
रविदत्त मिश्र, उमाशंकर अरगरिया, गणेश पौडेल, विदेश्वर यादव, सुकेश्वर यादव, कालीप्रसाद शाक्य, सुरेन्द्रप्रसाद चौधरी र महेन्द्र यादवले दोहोर्याएर मतगणना माग गर्नुभएको छ । त्यस्तै झलनाथ खनाल, बलदेव रेग्मी, कर्णबहादुर थापा र लालबहादुर थापाले पुनः मतदानको माग गर्नुभएको छ ।
यी मुद्दामध्ये केहीको सुनुवाइ भइसकेको छ भने केहीको सुनुवाइ जारी छ । कामुप्रधानन्यायाधीश हरिकृष्ण कार्कीको नेतृत्वमा गठन भएको संवैधानिक इजलासमा ईश्वरप्रसाद खतिवडा, आनन्दमोहन भट्टराई, अनिलकुमार सिन्हा र प्रकाशमानसिंह राउत हुनुहुन्छ।
