काठमाडौँ । नेपाली कांग्रेसका महामन्त्री एवं संसदीय दलको नेताको उम्मेदवार गगन कुमार थापाले निर्वाचनमा सांसदहरुलाई मत दिएको प्रमाणका रुपमा फोटो खिचेर ल्याउन लगाइएको भन्दै असन्तुष्टि जनाएका छन् ।
बुधबार बिहान मतदान सुरु हुनुअघि थापाले निर्वाचन समितिलाई मतदानस्थलमा मोबाइल निषेध गर्नुपर्ने बताएका थिए । तर सांसदहरुलाई मोबाइल नै लैजान रोक लगाउँदा उपयुक्त नहुने भन्दै समिति तयार भएन ।
मतदानका क्रममा कतिपय सांसदले आफूले दिएको मतको तस्बिर खिचेको पाइएको थापा बताउँछन् । ‘नखिच्नुस् भन्दाभन्दै १०/११ जनाले तस्बिर खिच्नुभयो । क–कसले खिच्नु भयो मलाई सबै थाहा छ, मेरो आग्रह खिचेका साथीहरुले आ–आफ्नो सामाजिक सन्जालमा नै पोष्ट गर्दिनुस् ।’
संसदीय दलको नेतामा प्रधानमन्त्री एवं पार्टी सभापति शेरबहादुर देउवा र थापाले उम्मेदवारी दिएका छन् ।
