बुथक्याप्चर भएको भन्ने थाहा हुँदाहुँदै दोहोर्याएर निर्वाचन गरिएनः ओली

काठमाडौँ । नेकपा एमालेका अध्यक्ष केपी शर्मा ओलीले निर्वाचन सम्पन्न गराउने निकायको भूमिका निष्पक्ष र प्रभावकारी हुन नसकेको भन्दै असन्तुष्टि जनाएका छन् ।

काठमाडौँमा पुस ५ गतेको अवसर पारेर एमालेले आयोजना गरेको विजय, बधाई र उत्सव कार्यक्रमलाई सम्बोधन गर्दै अध्यक्ष ओलीले निर्वाचन गराउने निकायहरुले कानुनसम्वत र कर्तव्यनिष्ठ रुपमा निर्वाचन सम्पन्न गरे भन्ने अवस्था नरहेको बताएका हुन् ।

अध्यक्ष ओलीले भने ‘निर्वाचन निष्पक्ष गराउने अभिभारा बोकेका निकायहरुको समेत भूमिका निष्पक्ष र प्रभावकारी हुन सकेन । कानुनसम्वत र कर्तव्यनिष्ठ रुपमा निकायले निर्वाभन सम्पन्न गराए भन्न सक्ने अवस्था रहेन । धाँधली र बुथक्याप्चर भएको प्रमाणहरु रहँदारहँदै दाहोर्याएर निर्वाचन गरिएन ।’

नेपालजस्तो देशमा ९८ प्रतिशत मत खस्नु र मरेका मानिसले भोट हाल्ने र विदेशमा भएकाहरुको समेत भोट हालियो भन्दै उनले आपत्ति जनाए । यस्ता कुराहरुलाई रोक्न सकिएन भने लोकतन्त्रप्रति जनताको विश्वास घट्दै जाने ओलीको भनाई छ ।