एजेन्सी । शुक्रबारदेखि प्रदर्शनमा आएको हलिउड फिल्म ‘अवतारः द वे अफ वाटर’ले दर्शकहरुबाट राम्रो प्रतिक्रियाहरु पाइरहेको छ ।
१२ वर्षपछि सिक्वेल रिलिज भएको फिल्मले विश्वभर राम्रो व्यापार गरिरहेको छ । यसैबीच, भारतमा फिल्म रिलिजको क्रममा अप्रिय घटना घटेको छ । ‘अवतार २’ हेर्न गएका एक युवकको मृत्यु भएको हो ।
भारतीय सञ्चारमाध्यम दैनिक जागरणका अनुसार आन्ध्र प्रदेशका लक्ष्मी रेड्डी श्रीनुको फिल्म हेर्ने क्रममा मृत्यु भएको हो । भाइसँग गएका रेड्डी फिल्म हेर्न निकै उत्साहित थिए ।
उनी फिल्म हेर्दै गर्दा बेहोस भएर भुइँमा लडेका थिए । उनलाई तत्कालै नजिकैको अस्पतालमा भर्ना गरिएको थियो । तर चिकित्सकले उनलाई मृत घोषित गरेका थिए । उनलाई हृदयाघात भएको जनाइएको छ । उनी उच्च रक्तचापको बिरामी थिए । मृतकको श्रीमती, एक छोरा र छोरी छन् ।
जेम्स क्यामरुनद्वारा निर्देशित यस फिल्मले भारतमा दुई दिनमै १०० करोडभन्दा बढीको व्यापार गरेको छ ।
