एजेन्सी । शाहरुख खान स्टारर फिल्म ‘पठान’लाई गुजरातमा प्रतिबन्ध लगाउन माग गरिएको छ ।
विश्व हिन्दू परिषद र बजरंग दलले चेतावनी दिँदै फिल्म गुजरातमा रिलिज भएमा कुनै अप्रिय घटना घट्ने र थिएटर मालिक जिम्मेवार हुने बताएका हुन् ।
उनीहरु भन्छन्, ‘फिल्मको गीतलाई अश्लीलतासँग जोडेर ‘बेशरम रंग’ नाम दिइएको छ । यो गीतले बलिउडको विकृत हिन्दू विरोधी मानसिकता देखाएको छ । हामी यी दृश्यहरू सहितको फिल्म गुजरातमा रिलिज हुन दिँदैनौं ।’
पठानको गीत ‘बेशरम रंग’मा दीपिका पादुकोणले पहेँलो रंगको बिकिनी लगाएकी छिन् । केही सामाजिक सञ्जाल प्रयोगकर्ताले पहेँलो रङ हिन्दू धर्मको प्रतीक भएको भन्दै दीपिकाले यही रङ लगाएर ‘बेशरम रंग’को गीतमा नाच्दै गरेको निकै आपत्तिजनक रहेको बताएका छन् । बिकिनीमा पवित्र रङ प्रयोग गर्नु मान्य नहुने बाइकट गर्नेहरुको भनाई छ ।
सिद्धार्थ आनन्दको निर्देशन रहेको यस फिल्ममा शाहरुख र दीपिकासँगै जोन अब्राहम पनि प्रमुख भूमिकामा छन् । फिल्म आउँदो वर्ष २५ जनवरीमा रिलिज हुनेछ ।
