काठमाडौँ । साविक विजेता फ्रान्स कतारमा जारी फिफा विश्वकपको फाइनलमा प्रवेश गरेको छ । दोस्रो सेमिफाइनल खेल अन्तर्गत अल बायेत मैदानमा भर्खरै सम्पन्न खेलमा मोरकक्कोलाई २-० गोलले पराजित गर्दै उपाधि नजिक पुगेको हो ।
फ्रान्सलाई जित दिलाउन थिओ हर्नान्डेज र रान्डल कोलो मोउनीले गोल गरे । खेलको पाँचौं मिनेटमा नै हर्नान्डेजले गोल गर्दै फ्रान्सलाई सुरुवाती अग्रता दिलाए ।
यस्तै, कोलो मोउनीले ७९ औं मिनेटमा गोल गर्दै फ्रान्सको अग्रता दोब्बर पारे । वैकल्पिक खेलाडीको रुपमा मैदान छिरेको ४४ सेकेन्डमा नै उनले गोल गर्न सफल भए । त्यसपछि खेलमा थप गोल हुन सकेन र फ्रान्स विजेता बन्यो । मोरक्कोले थुप्रै गोल गर्ने अवसरहरु सिर्जना गरेपनि गोल गर्न भने सकेन ।
अब फ्रान्सले उपाधिका लागि अर्जेन्टिनासँग प्रतिस्पर्धा गर्नेछ । हिजो भएको पहिलो सेमिफाइनल खेलमा क्रोएसियालाई ३-० गोलले हराउँदै अर्जेन्टिनाले फाइनलमा स्थान बनाइसकेको छ । फाइनल खेल आइतबार ८ः४५ बजे लुसेल मैदानमा हुनेछ ।
