काठमाडौं । नेकपा एमालेका नेता तथा सांसद भीम रावलले एमसीसी टेबल गरिनु आपत्तिजनक रहेको बताउनुभएको छ।
प्रतिनिधिसभाको बैठकमा बोल्दै सांसद रावलले भन्नुभयो, ‘एमसीसीजस्तो गम्भीर विषयमा प्रमुख विपक्षी एमालेले संसद अवरोध गरिरहेको अवस्थामा सरकारमा रहेका दलहरुबीचमा पनि सहमति नभएको अवस्थामा यसरी नेपाली जनताको भावना विपरित, नेपालको स्वाधिनता विपरित, जनता सडकमा रहेको अवस्थामा एमसीसी टेबल गरिने कुरा अत्यन्त आपत्तिजनक छ।’
यस्तै, सरकारले संघिय कानुन कार्यान्वयनमा किन नल्याएको भन्ने प्रश्न गर्दै उहाँले भन्नुभयो, ‘अहिले सभामुखले कार्यसुचीमा जुन विषय राख्नुभएको छ, यो कुन कानुनअन्तर्गत राख्नुभएको छ ? यसको लागि संघिय कानुन खोइ ? यो देश कानुनबाट चल्छ कि विदेशीको धाक धम्कीबाट चल्छ ?’ रावलले प्रश्न गर्नुभयो ।
