काठमाडौँ । निर्वाचन आयोगका प्रमुख आयुक्त दिनेशकुमार थपलियाले एउटा दलको अध्यक्ष अर्को दलबाट सांसद बन्न नसक्ने भन्ने कानुनी व्यवस्था नरहेको बताएका छन् ।
आयोगको बुधबार आयोजित पत्रकार सम्मेलनमा बोल्दै आयुक्त थपलियाले एउटा दलको अध्यक्ष अर्को दलको समानुपातिक सांसद बन्न नसक्ने विषयमा स्पष्ट कानुनी व्यवस्था नरहेकोले यस्तो विषय सम्बन्धित व्यक्तिको नैतिकतासँग जोडिने बताए ।
आयोगले हालको चुनावमा देखिएको समस्यालाई समावेश गरेर निर्वाचन कानुन संशोधन गर्ने उनको भनाई छ । ८ वटा निर्वाचन कानुनलाई एउटै कानुन बनाउने गरी संशोधन गर्न लागेको उनले जानकारी दिए । कुन दलले चुनावमा कति खर्च गरेको छ भन्नेबारेको विवरण आयोगसँग सुरक्षित रहेको पनि उनले बताए ।
उनका अनुसार पुस ३ गते समानुपातिक सांसदहरूलाई प्रमाणपत्र वितरण गर्ने आयोगको तयारी छ ।
