एजेन्सी । शाहरुख खान, दीपिका पादुकोण र जोन अब्राहम स्टारर फिल्म ‘पठान’ २५ जनवरीमा रिलिज हुँदैछ ।
यसैबीच, यी तीनै मुख्य सेलिब्रेटीले फिल्मका लागि मोटो रकम लिएको खबर आइरहेको छ । दीपिकाले पठानका लागि १५ करोड र जोनले २० करोड भारु लिएका छन् । यति मात्र होइन, शाहरुखले पठानका लागि १०० करोड भारु लिएको पनि खबर छ, जुन दुवै कलाकारको तुलनामा धेरै गुणा बढी हो ।
पठानमा सलमान खानको पनि सानो भूमिका रहेको छ, तर सलमानले फिल्ममा पारिश्रमिक लिन अस्वीकार गरेका छन् । फिल्मलाई एक्शन फिल्मका लागि चर्चित निर्देशक सिद्धार्थ आनन्दले निर्देशन गरेका छन् । उनले ‘ब्याङ ब्याङ’ र ‘वार’ जस्ता चलचित्र निर्देशन गरेका छन् । सिद्धार्थले फिल्म निर्देशनका लागि ६ करोड पारिश्रमिक लिएका छन् ।
चलचित्रमा अभिनेत्री डिम्पल कपाडिया पनि महत्वपूर्ण भूमिकामा देखिनेछिन् । रिपोर्टका अनुसार फिल्ममा दिग्गज अभिनेत्री रिसर्च एन्ड एनालिसिस विंग अफिसरको भूमिकामा देखिनेछिन् । तर, उनको पारिश्रमिकबारे भने केही खुलाइएको छैन । फिल्ममा आशुतोष राणा ‘र’ अफिसरको भूमिकामा देखिनेछन् ।
