पोखरा । नेकपा (माओवादी केन्द्र) का अध्यक्ष पुष्पकमल दाहाल प्रचण्डले अहिलेकै गठबन्धनको सरकार बन्ने बताउनुभएको छ ।
बुधबार आफ्नो जन्मगाउँ कास्कीको अन्नपूर्ण गाउँपालिकाको एक विद्यालयको कार्यक्रममा आउनुभएका अध्यक्ष प्रचण्डले अहिले नै सरकार कसको नेतृत्वमा बन्ने भन्ने विषयले प्रवेश पाइनसकेको बताउनुभयो ।
आवश्यक परे माओवादीले पनि सरकारको नेतृत्व लिने अवस्था आउनसक्ने उहाँको भनाइ थियो । अहिले सरकार गठनको विषय चलिरहेको भन्दै उहाँले भन्नुभयो, “ तर नेपाली कांग्रेसको संसदीय दलको नेता को हुन्छ भन्ने विषय महत्त्वपूर्ण रहेको छ ।”
अध्यक्ष प्रचण्डका अनुसार नेपाली कांग्रेसको संसदीय दलको नेता चुनिएपछि सरकार गठनको विषयले तीव्रता पाउने र आइपरे माओवादी पनि सरकारको नेतृत्व लिन तयार हुनुपर्ने बताउनुभयो ।
