काठमाडौँ । एमसीसीलाई अनुमोदन गर्न प्रतिनिधिसभाको आइतबारको बैठकमा टेबल गर्दा सत्ता साझेदार दलका सांसदहरु नै विरोधमा उत्रिएका छन् ।
नेकपा एमालेले संसद् बैठक अवरोध गर्न नाराबाजी गरिरहेका बेला सभामुख अग्निप्रसाद सापकोटाले अर्थमन्त्रीका तर्फबाट सञ्चार तथा सूचना प्रविधिमन्त्री ज्ञानेन्द्रबहादुर कार्कीलाई एमसीसी टेबल गर्न अनुमति दिनुभएको थियो ।
तत्पश्चात मन्त्री कार्कीले एमसीसी टेबल गर्दै गर्दा सत्ता साझेदार नेकपा (माओवादी केन्द्र) र नेकपा (एकीकृत समाजवादी) का सांसदहरुले उठेर नारबाजी गरिरहेका थिए ।
सत्ता गठबन्धनको बैठकमा एमसीसी टेबल गर्न सहमत भएका माओवादी केन्द्रका अध्यक्ष पुष्पकमल दाहाल प्रचण्ड सदनको बैठकमा कुर्सीमा बसिरहनुभएको थियो भने उहाँकै पार्टीका कृष्णबहादुर महरा, गिरिराजमणि पोखरेलसहित केही सांसदहरुले कुर्सीबाट उठेर नाराबाजी गरिरहनुभएको थियो ।
एकीकृत समाजवादीका सम्मानित नेता झलनाथ खनाल त रोष्ट्रममै पुगेर नाराबाजी गरिरहनुभएको थियो । सो पार्टीका केही सांसदहरुले पनि एमसीसी टेबल हुँदै गर्दा नाराबाजी गरेका थिए ।
त्यस्तै सत्ता साझेदार राष्ट्रिय जनमोर्चाका दुर्गा पौडेल र नेपाल मजदुर किसान पार्टीका प्रेम सुवालले पनि नाराबाजी गर्नुभएको थियो ।
सत्ता गठबन्धनको नेपाली कांग्रेसका सांसदहरु भने कुर्सीमा बसिरहनुभएको थियो ।
