काठमाडौं । प्युठानमा नयाँ बेसार प्रशोधन केन्द्र निर्माण र कृषि उपकरणको व्यवस्था गर्न नेपालस्थित जापानी राजदूत किकुता युताका र स्वयंसेवी नेपाल राष्ट्रिय समूहका अध्यक्ष शिव रिमालबीच एक अनुदान सम्झौतामा हस्ताक्षर भएको छ ।
जापान सरकारको ग्रासरुट ह्युमन सेक्युरिटी प्रोजेक्ट्स (जीजीपी) को अनुदान सहयोगअन्तर्गत यो आयोजनामा एक करोड रुपैयाँ अनुदान रहेको नेपालस्थित जापानी राजदूतावासले जनाएको छ ।
परियोजनाले बेसारको उत्पादन, प्रशोधन र व्यावसायीकरणका लागि कृषि उपकरण र प्रशोधन केन्द्रको व्यवस्था गर्न सहयोग गर्नेछ। अहिले स्वदेशमा उत्पादन हुने भन्दा बढी बेसार आयात हुने गरेको छ ।
बेसारको व्यावसायीकरण गर्न घरेलु केन्द्र नहुँदा स्थानीय बेसार किसानले खासै नाफा कमाउन सकेका छैनन् । यो अवस्था सुधार गर्न र कृषकहरूको आयआर्जनका लागि यो परियोजनाले सहयोग गर्ने बताइएको छ ।
यस परियोजनाले बेसार उत्पादनको वातावरणमा सुधार र प्यूठान जिल्लाका स्थानीय किसानको जीविकोपार्जनमा सुधार ल्याउने जापानी दूतावासको विश्वास छ ।
साथै दूतावासले कृषि सहयोगले जापान र नेपालका जनताबीचको मित्रतालाई वर्तमान र भावी पुस्ताका लागि अझ प्रगाढ बनाउने आशा गरेको छ ।
